მოსკოვისა და მინსკის ურთიერთობების გაუარესებამ ორი ქვეყნის სამხედრო თანამშრომლობაზე არ იმოქმედა: რუსეთი ძველებურად მნიშვნელოვანწილადაა დამოკიდებული ბელორუსის "ობორონკაზე" და ამიტომაც მას ეშინია მეზობელთან სამხედრო ურთიერთობის გაუარესება.
რამდენიმე ხნის წინ, მთავრობის პრეზიდიუმის სხდომაზე რუსეთის თავდაცვის მინისტრმა ანატოლი სერდიუკოვმა კოლეგებს რუსეთ-ბელორუსის შეთანხმება წარმოადგინა, რომელიც ორ ქვეყანას შორის სამხედრო-ტექნიკური თანამშრომლობის გაღრმავებას ეხება. ამ შეთანხმებას პრეზიდენტებმა გასული წლის 10 დეკემბერს მოაწერეს ხელი. გადაწყდა, რომ სახელმწიფოს მეთაური, ამ შეთანხმებას დუმაში რატიფიკაციისათვის შეიტანდა. ინფორმაციას ამის შესახებ "ნეზავისიმაია გაზეტა" ავრცელებს.
მათივე ინფორმაციით, მიუხედავად დაძაბული პოლიტიკური ურთიერთობებისა ორი ქვეყნის სამხედრო კონტაქტები ბოლო წლების განმავლობაში შინაარსიანი და კონკრეტული იყო. მოსკოვმა და მინსკმა თითქმის სინქრონულად მოახერხეს მოახდინეს საკავშირო სახელმწიფოს შიდა საზღვრის ერთობლივი დაცვის შესახებ შეთანხმების რატიფიცირება.
გასულ წეს ბელორუსის ტერიტორიაზე ჩატარდა საბჭოეთის დროიდან ყველაზე მსხვილი სამხედრო სწავლება "ზაპად 2009". მიმდინარე წელს რუსულ პოლიგონზე აშულუკზე კი ბელორუსი სამხედროები იწვრთნებოდნენ.
თუმცა მიუხედავად ყოველივე ამისა, გაზეთის ინფორმაციით, პრობლემები ორი ქვეყნის სამხედრო უწყებებს შორის მაინც არსებობს. რუსეთის თავდაცვის სამინისტროში აღიარებენ, რომ მინსკთან ურთიერთობების გაუარესება ნეგატიურად აისახება რუსული არმიის შეიარაღების პროგრამის განხორციელებაზე.
ამასთან ერთად, რუსეთში ბელორუსის პრეზიდენტის ალექსანდრე ლუკაშენკოს წინააღმდეგ ნეგატიური საინფორმაციო კამპანიის ახალი ტალღა კვლავ აგორდა. ტელეკომპანია "ენ-ტე-ვემ" კვლავ განაახლა ფილმების "ბატკა" სერიების ტრანსლირება, რომლებშიც ძალიან მწვავედაა გაკრიტიკებული ლუკაშენკოს პოლიტიკა და მისი პირადი ცხოვრება.
აღნიშნული ფილმები ტელეეთერში რუსეთის პრეზიდენტის დიმიტრი მედვედევის მკვეთრი გამონათქვამების შემდეგ გაჩნდა. ეს იყო ერთგვარი საპასუხო პასაჟი ლუკაშენკოს გამონათქვამებზე, რომლებიც მან ბელორუსში რუსი ჟურნალისტებისათვის მოწყობილ პრესკონფერენციაზე გააკეთა და რომელთა დროს, დიპლომატიური გამონათქვამების უგულვებელყოფით ლუკაშენკომ გამოხატა თავისი უკმაყოფილება "კრემლის გაუაზრებელი და უგუნური" პოლიტიკის გამო.
თავის მხრივ რუსეთის პრეზიდენტმა ლუკაშენკოს ურჩია, ორ ქვეყანას შორის ურთიერთობების დაძაბვის მაგიერ თავის საქმეებს მიხედოს და მის სამშობლოში უგზო-უკვლოდ დაკარგული ადამიანების ბედით დაინტერესდეს.
მედვედევმა ასევე გააკრიტიკა ლუკაშენკოს მიერ მისთვის მიცემული პირობის შეუსრულებლობა, რომელიც აფხაზეთისა და ე.წ. სამხრეთ ოსეთის დამოუკიდებლობის აღიარების საკითხს ეხებოდა.
მეტიც, მედვედევის შემდეგ, კრემლის ოფიციალური პოზიცია ბელორუსთან მიმართებაში რუსეთის პრეზიდენტის პრესმდივანმა გაახმოვანა და განაცხადა, რომ ლუკაშენკოს ანტირუსულმა რიტორიკამ ისე დაძაბა ორ ქვეყანას შორის ურთიერთობები, რომ ისინი ჩიხში შევიდნენ და ძველებური ვერ იქნებიან.
