საქართველოს სპორტისა და ახალგაზრდობის მინისტრის, ვლადიმერ ვარძელაშვილის თქმით, ვანკუვერის 2010 წლის ზამთრის ოლიმპიადაზე ქართველი მოციგავე ნოდარ ქუმარიტაშვილის დაღუპვა ტრასის გაუმართაობამ გამოიწვია და არა სპორტსმენის შეცდომამ.
როგორც ვარძელაშვილმა "ჯი-ეიჩ-ენს" განუცხადა, ქუმარიტაშვილი პროფესიონალი სპორტსმენი იყო და მის ისეთ შეცდომაზე საუბარი, რომელიც სასიკვდილო შედეგით დამთავრდებოდა, ზედმეტია.
"ქუმარიტაშვილის გამოცდილება იქიდანაც ჩანს, რომ ის მსოფლიოს საკუთესო 18 მოციგავეს შორის იყო. ამას მოწმობს ფაქტის შემსწავლელი კომისიის დასკვნაც, სადაც ნათლად წერია, რომ ქუმარიტაშვილი პროფესიონალი სპორტსმენობის ყველა პირობას აკმაყოფილებდა. მისი დაღუპვა გამოიწვია ტრასის 1 გრადუსით დახრამ იმ მონაკვეთში, სადაც სპორტსმენს 136 კმ/სთ-ით უნდა გაევლო, მაგრამ ტრასის გაუმართაობამ სპორტსმენი 148-ით გაატარა, რამაც ფატალური შედეგით დაასრულა მისი ოლიმპიადაზე გამოსვლა", - განაცხადა ვარძელაშვილმა.
შეგახსენებთ, რომ მოციგავე ნოდარ ქუმარიტაშვილი 2010 წლის ვანკუვერის ოლიმპიადაზე საცდელი დაშვების შემდეგ დაიღუპა. კანადის იუსტიციის სამინისტრომ ამ ფაქტთან დაკავშირებით 16-გვერდიანი დასკვნა გამოაქვეყნა, სადაც ფაქტი უბედურ შემთხვევედაა აღწერილი და სპორტსმენის შეცდომაზეა საუბარი.
