2011 წლის ბიუჯეტთან დაკავშირებით განხილვებს პირველად ჯანდაცვისა და საფინანსო საბიუჯეტო კომიტეტები გამართავენ. შესაბამისად, ამ კომიტეტებზე განისაზღვრება ქვეყნისთვის მნიშვნელოვანი სფეროების დაფინანსების პარამეტრები. ამის შესახებ განცხადება ბიუროს სხდომაზე საფინანსო-საბიუჯეტო კომიტეტის თავმჯდომარემ ზურაბ მელიქიშვილმა გააკეთა.
როგორც მან აღნიშნა, პარლამენტში უკვე შემოსულია 2011 წლის ბიუჯეტის პროექტი, რომელიც განსაზღვრულია 6 მილიარდ 960 მილიონი ლარით. მელიქიშვილი აღნიშნავს, რომ გაზრდილია საგადასახადო შემოსავლები, თუმცა იმის გამო, რომ მცირდება საზღვარგარეთიდან კრედიტების აღების წილი, ბიუჯეტის საერთო მოცულობა, ფაქტობრივად, უცვლელი რჩება.
მელიქიშვილის თქმით, ორი პროცენტით არის შემცირებული საბიუჯეტო დეფიციტი. პრიორიტეტებად რჩება ინფრასტრუქტურის განვითარების საკითხი, განათლებისა და სოციალური სფეროები. შესაბამისად, ბიუჯეტის პროექტის განხილვას დაიწყებენ ჯანდაცვისა და საფინანსო საბიუჯეტო კომიტეტები, რომლებიც სათანადო სამინისტროებთან ერთად შეიმუშავებენ პრიორიტეტული სფეროს დაფინანსების პარამენტრების საკითხს და შემდეგ უკვე მთავრობის მხრიდან გადამუშავებული ვარიანტის განხილვაში ჩაერთვება პარლამენტის ყველა ფრაქცია და კომიტეტი.
პარალმენტის თავმჯდომარე კი აქცენტს აკეთებს იმაზე, რომ "ბიუჯეტი, ფაქტობრივად, 2 მილიარდით გაიზრდება და მნიშვნელოვანი არის ის, რომ ეს თანხა დარჩება კერძო სექტორში ეკონომიკის განსავითარებლად". ამიტომ იგი განსაკუთრებულ დავალებას ჯანდაცვის კომიტეტის თავმჯდომარეს აძლევს, რათა ჯანდაცვის მინისტრთან ერთად იმსჯელოს აღნიშნული სფეროს პრიორიტეტულ საკითხებზე.