შტუდგარტში ახალი სადგურის მშენებლობის მოწინააღმდეგეთა საპროტესტო აქცია დაარბიეს. სამართალდამცავებმა აქციის მონაწილეთა დასაშლელად ცრემლსადენი გაზი და წყლის ჭავლი გამოიყენეს. აქციის მონაწილეები ახალი სადგურის მშენებლობისათვის საჭირო პარკის გაჩეხვას ეწინააღმდეგებოდნენ.
შტუდგარდის პროფკავშირები და პოლიტიკოსები პოლიციას ძალადობაში ადანაშაულებენ და ბუნდესტაგში ამ ინციდენტის განხილვასა და დაგმობას მოითხოვდნენ. ინფორმაციას ამის შესახებ "DW-World.De " ავრცელებს.
გერმანული მედია აღნიშნავს, რომ მომხდარის გამო აღნიშნულმა ინციდენტმა მშვიდობიანი ხასიათი დაკარგა.
აქციის ორგანიზატორთა განცხადებით, აქციის დარბევის გამო დაზიანებები მიიღო 300 დან 400- მდე ადამიანმა, მათ შორის არიან სკოლის მოსწავლეებიც.
ამავე დროს აღსანიშნავია, რომ თავად სამართალდამცავები უარს აცხადებენ, გამოაქვეყნონ აქციის დარბევის დროს დაზარალებულთა მათი რაოდენობა. პოლიცია აცხადებს, რომ სამართალდამცავთა ქმედებები გამართლებულია იმით, რომ აქციის მონაწილეებმა მათ ქვების სროლა დაუწყეს.
პოლიცია ასევე აცხადებს, რომ აქციაში 1000 ზე მეტი სკოლის მოსწავლე მონაწილეობდა. დაახლოებით 30 -მა სკოლის მოსწავლემ კი ხელშ პოლიციის ავტომობილი ჩაიგდო. მათ ამოყვანას მანქანიდან კი სამართალდამცავთა დამატებითი ძალი დასჭირდა.
ამავე დროს ადგილობრივი პროფკავშირების ყოფილი ლიდერი სიბილა შტამმი პოლიციას ძალადობაში ადანაშაულებს. მისი თქმით, პოლიციის წარმომადგენლები დემონსტრანტებს ყოველგვარი გაფრთხილების გარეშე მიწაზე აგდებდნენ, _ "ამგვარი რამ 1968 წლიდან არ მინახავს", _ აცხადებს შტამმი.
პოლიციის ქმედებებს "მწვანეებიც" გმობენ. "მწვანეთა პარტიის" წარმომადგენელი ვერნერ ველფე აცხადებს, რომ შემაშფოთებელია, რომ პოლიციელები სკოლის მოსწავლეების მიმართ ძალას იყენებდნენ. "ჩვენს ბავშვებს სულაც არ სჭირდებათ, რომ მათ თავის თავზე გამოსცადონ სახელმწიფოს მძიმე ხელი", _ აცხადებს პოლიტიკოსი.
პარლამენტარი, ქრისტიან-დემოკრატიული კავშირის ფრაქციის თავმჯდომარე პეტერ ხაუკი კი თავის მხრივ აქციის ორგანიზატორებსა და სადგურის აშენების მოწინააღმდეგეებს ადანაშაულებს იმაში, რომ მათ სკოლის მოსწავლეები საკუთარი მიზნების მისაღწევად გამოიყენეს.
"მიმაჩნია უპასუხისმგებლობად, რომ დედებმა და მამებმა აქციაზე არა მხოლოდ წაიყვანეს თავიანთი შვილები, არამედ ისინი მომიტინგეთა პირველ რიგებში ჩააყენეს", _ აცხადებს პარლამენტარი და აღნიშნავს, რომ იგი სრულებით ამართლებს პოლიციის ქმედებებს.
"სამართლებრივი სახელმწიფოს ერთ-ერთი დამახასიათებელი ნიშანი არა მხოლოდ გადაწყვეტილებების მიღება, არამედ მათი შესრულებაცაა", _ აცხადებს პეტერ ხაუკი.
