კიბერ შეტევის შედეგად, WhatsAapp-ში ადამიანების შერჩეულ ჯგუფს უსმენდნენ. ჰაკერებმა შეძლეს და დისტანციურად მოახდინეს ისეთი სისტემის ინსტალაცია, რომლითაც მობილურ ტელეფონებსა და სხვა მოწყობილობებს უსმენდნენ.

Financial times-ის ინფორმაციით, ამ შეტევის უკან ისრაელში დაფუძნებული NSO Group-ია, რომელიც მთავრობებს ისეთი ტიპის კიბერსერვისებს სთავაზობს, რომელიც დანაშაულისა და ტერორიზმის პრევენციას უზრუნველყოფს.

როგორც BBC-ის ჟურნალისტი საგამოძიებო მასალაში აღნიშნავს, NSO Group, სხვადასხვა ქვეყნის სპეცსამსახურებთან თანამშრომლობს.

WhatsApp-ში BBC-ის განუცხადეს, რომ კიბერშეტევა, მომხმარებელთა შერჩეულ ჯგუფზე ზარებს ახორციელებდა. საზიანო კოდი იმ შემთხვევაშიც კი ახერხებდა ინფორმაციის მოპოვებას, თუ სამიზნე აუდიტორიის მომხმარებელი უცხო ნომრიდან შემოსულ ზარს არ უპასუხებდა. კომპანიაში უჭირთ დაზარალებულთა რაოდენობის დასახელება, თუმცა ამბობენ,  რომ თავდასხმა იდეალურად ორგანიზებული იყო.

პარასკევს  WhatsApp-მა ჰაკერული შეტევის ზიანი აღმოფხვრა, ორშაბათს კი 1,5 მილიარდ მომხმარებელს აპლიკაციის განახლება შესთავაზა. ირკვევა, რომ პირველად შეტევა მაისის დასაწყისში განხორციელდა.

ხუთშაბათს, 16 მაისს, თელ-ავივის სასამართლო მოისმენს „ამნესტი ინთერნეიშენელის“ პეტიციას, რომელიც ისრაელის თავდაცვის მინისტრს NSO Group-თვის სარეალიზაციო პროდუქტებზე ლიცენზიის შეჩერებას მოსთხოვს.