სტამბოლში აია სოფიას მუზეუმის სტატუსის შეცვლა და მისი მეჩეთად გადაქცევა აშშ-ის პრეზიდენტის დონალდ ტრამპის გადაწყვეტილების პასუხი იქნება, რომელმაც გოლანის სიმაღლეებზე ისრაელის სუვერენიტეტი აღიარა. როგორც სააგენტო Anadolu იუწყება, ამის შესახებ თურქეთის პრეზიდენტმა რეჯეფ ტაიპ ერდოღანმა განაცხადა.
„ჩვენ, შესაძლოა, წმინდა სოფიაში შესვლა უფასო გავხადოთ, თუმცა მხოლოდ ამას არ გავაკეთებთ. ადგილობრივი არჩევნების შემდეგ წმინდა სოფიას ნამდვილ სტატუსს დავუბრუნებთ. რას ნიშნავს ეს? ჩვენ შევუცვლით სტატუსს და მეჩეთად ვაქცევთ. ახლა ტრამპი აცხადებს, რომ იერუსალიმი ისრაელის დედაქალაქია. ასე არ არის? გოლანის სიმაღლეებს ოკუპანტ ისრაელს აძლევს. თქვენ მიიღებთ პასუხს თურქეთიდან“, - აღნიშნა ერდოღანმა ტრაბზონში გამართულ მიტინგზე.
24 მარტს ერდოღანმა განაცხადა, რომ თურქეთის ხელისუფლებამ, შესაძლოა, წმინდა სოფიას ტაძარს სტატუსი შეუცვალოს, რათა იქ შესვლა ყველას უფასოდ შეეძლოს. მისი თქმით, ყველა აღმსარებლობის ტურისტი უფასოდ შედის ცისფერ მეჩეთში, რომელიოც მეზობლად მდებარეობს, „ამიტომ წმინდა სოფიასთან დაკავშირებითაც შეასძლოა ანალოგიურად მოვიქცეთ“, - განაცხადა ერდოღანმა.
საბერძნეთის საგარეო საქმეთა მინისტრმა განაცხადა, რომ ათენი აია სოფიას ტაძრის, რომელიც ახლა მუზეუმია, მეჩეთად გადაქცევას ქრისტიანებისა და მსოფლიო თანამეგობრობის შეურაცხყოფად მიიჩნევს.