აშშ-ის კონგრესის წარმომადგენელთა პალატამ დონალდ ტრამპის პირველი ვეტო ვერ დაძლია.
ვეტოს დაძლევას ხმა 258-მა კონგრესმენმა მისცა, ხოლო 181 წინააღმდეგ წავიდა. იმისთვის, რომ ვეტო დაძლეულიყო, მისთვის მხარი პალატის წევრების ორ მესამედს უნდა დაეჭირა, ანუ 290 კონგრესმენს. რესპუბლიკური პარტიის წევრთა უმეტესობა ტრამპს მიემხრო, ვეტოს დაძლევას მხარი მხოლოდ 14-მა რესპუბლიკელმა დაუჭირა.
ამერიკის სენატი ამ საკითხთან დაკავშირებით ახალ კენჭისყრას არ ჩაატარებს, რადგან ვეტო თავის მოქმედებას ინარჩუნებს. იუწყება სააგენტო Associated Press-ი.
მარტის შუა რიცხვებში ტრამპმა ვეტო დაადო კონგრესის რეზოლუციას, რომელიც მექსიკის საზღვარზე საგანგებო მდგომარეობის რეჟიმის გაუქმებას ითვალისწინებდა. ტრამპმა საგანგებო მგომარეობა თებერვალში დააწესა, რათა კედლის ასაგებად 8 მლრდ დოლარი მიეღო.
პრეზიდენტმა საგანგებო მდგომარეობის გამოცხადების შესახებ გადაწყვეტილება იმის გამო მიიღო, რომ კონგრესი არ დათანხმდა ამ მიზნებისთვის 5,7 მლრდ დოლარის გამოყოფას. კედლის ასაშენებლად კონგრესის მიერ მიღებული კანონპროექტი 1,375 მლრდ დოლარის გამოყოფას ითვალისწინებს.
არალეგალური იმიგრაციის წინააღმდეგ ბრძოლის ფარგლებში მექსიკის საზღვარზე კედლის აშენება ტრამპის ერთ-ერთი მთავარი წინსაარჩევნო დაპირება იყო.