საქართველოში ინტერნეტის ყველა მომხარებელმა კარგად იცის ინტერნეტპროვაიდერების მომსახურების დაბალი დონისა და მიწოდების დაბალი ხარისხის შესახებ, თუმცა როცა საქმე გვაქვს თაღლითობასთან, ეს უკვე ყურადსაღები თემაა. ქართულ ინტერნეტბარაზრზე მოთამაშე ორი ძირითადი პროვაიდერი თაღლითობის ამ სქემას წარმატებით იყენებს. საუბარია იმ გადასახადზე, რომლის მომსახურებაც მათ აბონენტისთვის არ გაუწევიათ. მაგალითად, თუ თქვენ ერთი კვირის განმავლობაში ინტერნეტი პროვაიდერის მიზეზით არ მოგეწოდებათ, ამ გადასახადას არავინ გაპატიებთ. "ჯი-ეიჩ-ენი" 3 დღის განმავლობაში ცდილობდა "კავკასუს ონლაინის" მენეჯერს დაჰკავშირებოდა, თუმცა უზრდელად გაწვრთნილი ოპერატორები ძალიან მარტივად პასუხობენ _ "მენეჯერთან ვერ დაგაკავშირებთ". კითვაზე რატომ, ისევ უმარტივესი ამებას პასუხია - "იმიტომ! კარგად ბრძანდებოდეთ". იგივე ვითარებაა "სილქნეტში". განსხვავება მხოლოდ ისაა, რომ თუ "კავკასუს ონლაინში" წარმოქმნილი ტექნიკური პრობლების მიზეზად თითს "სილქნეტისკენ" გაიშვერენ, ამ უკანასკნელში მიზეზად დაბალი ძაბვის გამო "მოდემის" გადახურებასა და ხაზებს აბრალებენ. თითქოს ხაზები სხვა კომპანიის კუთვნილება იყოს. უბრალოდ, ასე მარტივად ცდილობენ მოიშორონ გაღიზიანებული აბონენტი თავიდან, რომელიც თვიდან თვემდე საბონენტო გადასახადს, შესაძლოა, რის ვაივაგლახით იხდის. ასეც რომ არ იყოს, ის იხდის და შესაბამისად მომსახურებაც სჭირდება.
ასე არ ფიქრობენ პროვაიდერი კომპანიების ხელმძღვანელები. მათ კარგად იციან, რომ თითეული გათიშული წუთი მათ ჯიბეზე აისახება და თუ აბონენტი კვირიდან კვირამდე არკვევს, რატომ არ მიეწოდება ინტერნეტი, პასუხს არავინ გასცემს.
თაღლითობის კიდევ ერთი სქემა: ვთქვათ თქვენ შეიძინეთ 8 მგბ-იანი ინტერნეტი. ერთ მშვენიერ დღეს, თუ ტექნიკოსს ჰკითხავთ, რატომ მოგეწოდებათ ინტერნეტი ცუდად, უმეტეს შემთხვევაში, ასეთ პასუხს მოისმენთ _ ხაზი 6-ის მეტს "ვერ იჭერს და სიჩქარე 8-ზე რომ დავაყენოთ, წყვეტა გექნებათ". მომხმარებელიც ძალიან ადვილად ეგუება ამ მწარე სინამდვილეს და ოღონდ მიიღოს ინტერნეტი, თავად ერთვება უკანონო გაიგებაში. არადა, ეს კომპანიის მიერ მიღებული უკანონო შემოსავალი მომხარებლისთვის მიყენებული ზიანის ხარჯზე ხდება.
კომპანია თავის ბრალეულობას ვერ ხედავს იმაში, რომ მის გამო ინტერნეტის გარეშე დარჩენილ მომხმარებელს არ შეუძლია სამუშაო საათის დასრულების შემდეგ მიმართოს. კავკასუსის თანამშრომლები, როგორც ეს "ცივილიზებული კომპანიების" თანამშრომლებს შეეფერებათ, 18:00 საათზე შინ მიბრძანდებიან და შესაბამისად ამ დროის შემდეგ უკვე თათა, თეკლა ან მაყვალა გიპასუხებთ, რომ ტქენიკურმა ჯგუფმა მუშაობა დაასრულა და ხვალ დარეკეთ. მხოლოდ ამის სათქმელად მოპასუხე თეკლეები და ნათიები მერე ადგებიან და თუ გაღიზიანებული აბონენტი აღშფოთებას გამოხატავს, მის ჩანაწერს სხვადასხვა საიტზე გამოაქვეყნებენ.
კავკასუს ონლაინის არც ერთმა ოპერატორმა არ იცის, რატომ უნდა გადაიხადოს აბონენტმა იმ მომსახურების გადასახადი, რომელიც არ მიუღია. მენეჯერთან არ გაკავშირებენ. მაშინ ისმის კითხვა რა ქნას აბონენტმა? მუდმივად იყოს ამ თაღლითური სქემის მსხვერპლი? ამაზე პასუხი არც თითქმის უფუნქციო კომუნიკაციების მარეგულირებელ კომისიას აქვს. მრავალათასლარიანი ხელფასითა და დაყენებული ხმით მშვიდად და აუღელვებლად გიპასუხებენ - მიმართეთ სასამართლოს.
დღეისათვის "კავკასუს ონლაინის" მორიგი უყურადღებობის გამო მომხმარებელთა მნიშვნელოვანი ნაწილი ინტერნეტის გარეშეა დარჩენილი, მაგრამ ეს ფაქტი კომპანიისთვის საგანგებო რეჟიმში მუშაობის საფუძველი არ გამხდარა. აღნიშნული შემთხვევაც ადასტურებს, რომ "კავკასუსი" კლიენტებზე ორიენტირებული კომპანია არაა და მომხმარებელს მხოლოდ საკუთარი შემოსავლის წყაროდ განიხილავს.
"კავკასუს ონლაინის" მხრიდან თავისი აბონენტების მიმართ უყურადღებობას ერთ-ერთი მენეჯერი თეონა მარტაშვილიც ადასტურებს. მაისში არსებული პრობლების დროს, როდესაც კავკასუსის თითქმის ნახევარზე მეტი აბონენტი გათიშული იყო თეონა მარტაშვილმა "ჯი-ეიჩ-ენთან" საუბარში არ დააკონკრეტა კონკრეტული აბონენტების რაოდენობა, რომელიც კომპანიამ ინტერნეტის გარეშე დატოვა და განმარტა, რომ "ასე ზეპირად" ამ რიცხვს ვერ დაასახელბდა.
"სილქნეტისა" და "კავკასუსის" თავნებობა იქამდე მიდის, რომ, მაგალითად, 5-6-7-დღიანი ლოდინის შემდეგ ერთც და მეორეც გიპასუხებენ, _ გადადით სხვა პროვაიდერთან. ასეთ დროს მობილური ოპერატორები მახსენდება, თუმცა ერთ მშვენიერ დღეს აღმოაჩინეს, რომ კონკურენცია არც ისე მარტივი ყოფილა...
ინტერნეტპროვაიდერების შემთხვევაში კი ორი მონოპოლისტი კომპანია, რომელთა გაერთიანების შესახებ საუბარი უკვე მიმდინარეობს, თავს ჯერჯერობით კომფორტულად გრძნობს. თუ რატომ არ რეაგირებენ მათ თაღლითობებზე, არც ისე რთული გასაგები უნდა იყოს. ისევე, როგორც "სილქნეტი" მოიქცა, ერთ მშვენიერ დღეს "კავკასუსიც" რამდენიმე შპს-დ დაიშლება, ვალდებულებებს მათზე გადაანაწილებს, მერე გააკოტრებს და ახლად დაარსებული შპს ვალდებულებების გარეშე განაგრძობს მუშობას. ცალკე თემაა ჩეხეთსა და პოლონეთში დაარსებული კომპანიებისგან ნაყიდი ე.წ. შავი ტრაფიკი. თუმცა ამაზე სხვა დროს.
