„ჩემი დაცვის ქვეშ მყოფი დუმილის უფლებას იყნებეს, მას დაკავების დროს დაზანებები აქვს მიყენებული“, - განუცხადა „ჯი-ეიჩ-ენს“ „გალერის“ დაცვის სამსახურის უფროსის, ვიქტორ ჟამუტაშვილის ადვოკატმა, ხათუნა ხურცილავამ.
ადვოკატი არ გამორიცხავს, რომ შესაძლებელია, ადგილზე ნარკოტიკების „ჩადება“ მოხდა.
„მოგეხსენებათ, კაფე „გალერის“ იურისტი ვარ, იქ მოხდა ჩხრეკა. თანამშრომლებმა მითხრეს, რომ ნარკოტიკი იყო იმ ადგილზე, სადაც მანამდე ნამდვილად არ იყო. ამას რამდენიმე მოწმე დაადასტურებს. გამოძიება მიმდინარეობს, დანიშნულია ექსპერტიზები“, - აცხადებს ხურცილავა.
რაც შეეხება შსს-ს ინფორმაციას, რომ დაკავებული 8 ნარკორეალიზატორის მიერ, ნარკოტიკული საშუალების გასაღების თითოეულ ფაქტზე პოლიციას გააჩნია მოსამართლის განჩინების საფუძველზე განხორციელებული ვიდეოჩანაწერი, ადვოკატი აცხადებს რომ მასალებს ჯერ არ გაცნობია და აღნიშნულთან დაკავშირებით კომენტარს მოგვიანებით გააკეთებს.
„ინფორმაციის დონეზე ვიცი, რომ რაღაც ჩანაწერები არსებობს, მაგრამ სანამ მასალებს არ გავეცნობი, მანამდე სრულყოფილი პასუხის გაცემა არ შემიძლია. ჩემი დაცვის ქვეშ მყოფს 50 აბ ექსტაზს ედავებიან. გამოძიება ჯერ ბრალთან დაკავშირებით ჩამოყალიბებული არ არის, როცა ბრალის დადგენილება გადმომეცემა, დეტალურად მოგახსენებთ“, - დასძენს ხურცილავა.
ცნობისთვის, წუხელ კლუბ „ბასიანში“ და კაფე „გალერიში“ სპეცოპერაცია ჩატარდა, რის შედეგადაც დაკავებულია ნარკოტიკული საშუალების გამსაღებელი 8 პირი. სპეცოპერაცია გააპროტესტეს კლუბ „ბასიანში“ და კაფე „გალერიში“ მყოფმა პირებმა, ისე რიგითმა მოქალაქეებმა, რომლებმაც მოგვიანებით პარლამენტის შენობასთან გადაინაცვლეს. საპროტესტო აქციაზე ადმინისტრაციული წესით, ოფიციალურად დაკავებულია 20 პირი, თუმცა არაოფიციალური ინფორმაციით, დაკავებულთა რაოდენობა გაცილებით მეტია.