[სოფო კილაძე] უნდა იცავდეს ადამიანის უფლებებს და ამ დროს ვის უფლებებს იცავს, არავინ არ იცის, - ამის შესახებ "შენების მოძრაობის" წევრმა ანი მიროტაძემ ტელეკომპანია "პირველის" ეთერში განაცხადა.
ანი მიროტაძე დღევანდელ საპროტესტო აქციას გამოეხმაურა და აღნიშნა, რომ სოფო კილაძის გადადგომით არაფერი შეიცვლება, რადგან მან უკვე ყველაფერი გააფუჭა და ადამიანებს პარტიის მიმართ ნდობა დააკარგვინა. მისივე თქმით, "ასეთი სოფო კილაძე" ბიძინა ივანიშვილს ბევრი ჰყავს.
"მე ვკითხულობ - ადამიანის უფლებათა დაცვის კომიტეტის თავმჯდომარეს რომ ნიშნავ, მინიმუმ მისი ბიოგრაფიისთვის ხომ უნდა ჩაეხედათ? მინიმუმ ის ხომ მაინც უნდა ეკითხათ, ამ ადამიანს საერთოდ რაიმე გამოცდილება ჰქონია თუ მხოლოდ პარტიული ერთგულება და ეს რაღაც პრინციპი რომ "თუ პარტიას ჭირდება, ყველაფერს ვიზამ", ეს არის გარანტია იმის რომ აუცილებლად წარმატებული იქნება? ახლა რომ მოხდეს პროტესტის ფონზე ამ ქალბატონის თანამდებობიდან გადაყენება, მაინც არაფერი არ იცვლება, იმ მხრივ არაფერი არ იცვლება, რომ უკვე გააფუჭა ამ ადამიანმა, რა გააფუჭა იცით? ადამიანებს ნდობა დააკარგვინდა გუნდის მიმართ. უნდა იცავდეს ადამიანის უფლებებს და ამ დროს ვის უფლებებს იცავს, არავინ არ იცის. ასეთი სოფო კილაძე, სამწუხაროდ, ძალიან ბევრი ყავს ბიძინა ივანიშვილს", - განაცხადა მიროტაძემ.
ცნობისთვის, დღეს ლგბტ აქტივისტებმა პარლამენტის ადამიანის უფლებათა დაცვის კომიტეტის თავმჯდომარის პოზიციიდან სოფო კილაძის გადაყენების მოთხოვნით, კომიტეტის სხდომაზე პლაკატები გაშალეს. ლგბტ აქტივისტების მიერ პლაკატების გაშლას დარბაზში ხმაური მოყვა, რის შემდეგაც ტექნიკური შესვენება გამოცხადდა.
შეგახსენებთ, თავდაპირველად კილაძის გადადგომის მოთხოვნით, ლგბტ აქტივისტებმა აქცია პარლამენტთან გამართეს. მოგვიანებით, ისინი კომიტეტის სხდომაზე დასასწრებად შევიდნენ.
მოგვიანებით, სოფო კილაძემ ლგბტ აქტივისტებთან სამუშაო რეჟიმში შეხვედრისთვის მზადყოფნა გამოთქვა.
ლგბტ აქტივისტების განცხადებით, სოფო კილაძის საქმიანობა და ღირებულებები ადამიანის უფლებებისა და თანასწორობის პრინციპებს არ შეესაბამება.
კილაძის გადადგომის გარდა, "თანასწორობის მოძრაობა" მოითხოვს, ადამიანის უფლებათა დაცვის კომიტეტმა შეასრულოს ნაკისრი ვალდებულებები და უზრუნველყოს ადამიანის უფლებების არაშერჩევითი დაცვა.
„არ აღვნიშნავთ, ჩვენი ნებაა" - ასე უპასუხა ადამიანის უფლებათა დაცვის კომიტეტის თავჯდომარემ, სოფიო კილაძემ ჟურნალისტის მიერ დასმულ შეკითხვას. როგორც თავჯდომარის განცხადებიდან ჩანს, კომიტეტი ჰომოფობიასთან და ტრანსფობიასთან ბრძოლის დღის აღნიშვნას აღარ აპირებს, მიუხედავად იმისა, რომ 17 მაისის ყოველწლიურად აღნიშვნა 2017-2020 წლების სამოქმედო გეგმაში იყო გათვალისწინებული.
„პარლამენტის ადამიანის უფლებათა დაცვის კომიტეტის საქმიანობის მიზანია ხელი შეუწყოს დემოკრატიული და ადამიანის უფლებების პატივისცემაზე დაფუძნებული საზოგადოების მშენებლობას, უმცირესობების წარმომადგენელთა სრულყოფილ ინტეგრაციას საზოგადოებაში, ადამიანის უფლებების და სამოქალაქო ინტეგრაციის სფეროში არსებული საკანონმდებლო ბაზის სრულყოფას”.
თუმცა:
• უშუალოდ სოფიო კილაძის მიერ მოხდა კონსტიტუციაში ქორწინების განსაზღვრების ინიცირება, რომელიც ყველა საერთაშორისო ორგანიზაციის მიერ იქნა შეფასებული როგორც უკანგადადგმული ნაბიჯი ლგბტ ადამიანების უფლებრივი მდგომარეობის თვალსაზრისით!
• ადამიანის უფლებათა კომიტეტის თავმჯდომარე შერჩევითი პრინციპით უდგება ადამიანის უფლებებს და არაფერს აკეთებს ლგბტ ადამიანების უფლებრივი მდგომარეობის გასაუმჯობესებლად;
სოფიო კილაძე და მისი კომიტეტი ხშირად უჭერენ მხარს ადამიანის უფლებების საწინააღმდეგო ინიციატივებს. შეგახსენებთ, რომ სოფიო კილაძე ასევე ღიად უჭერს მხარს რეპრესიულ ნარკოპოლიტიკას საქართველოში, რომელიც საქართველოს მოქალაქეების სისტემური ჩაგვრის ინსტრუმენტია.
დღესდღეობით, საჯაროდ გაცხადებული მიზნების მიუხედავად, ადამიანის უფლებათა დაცვის კომიტეტი და კომიტეტის თავმჯდომარე, სოფიო კილაძე სისტემატიურად უგულვებელყოფს ადამიანის უფლებებს!
ჩვენ მოვითხოვთ:
1. ადამიანის უფლებათა დაცვის კომიტეტმა შეასრულოს ნაკისრი ვალდებულებები და უზრუნველყოს ადამიანის უფლებების არაშერჩევითი დაცვა;
2. საქართველოს პარლამენტმა გაათავისუფლოს სოფიო კილაძე ადამიანის უფლებათა დაცვისა კომიტეტის თავმჯდომარეობიდან, რადგან მისი საქმიანობა და ღირებულებები არ შეესაბამება ადამიანის უფლებების და თანასწორობის პრინციპებს", - ნათქვამია "თანასწორობის მოძრაობის" მიერ გავრცელებულ განცხადებაში.