„სპეცოპერაციის დროს, მაჩალიკაშვილს სავარაუდოდ, ყურსასმენი ეკეთა. მტკიცებულებაც წარვადგინე, თუ რა მელოდია გადაუგზავნა მან თავის ნათესავს, რომელსაც ის ყურსასმენებით უსმენდა. აღნიშნული ყურსასმენები გამქრალია. ვამტკიცებ იმას, რომ სპეცრაზმელის შესვლა მას საერთოდ არ გაუგია. ოთახის კარის შენგრევიდან წამიერადვეა გასროლილი“, - აცხადებს „ჯი-ეიჩ-ენთან“ სპეცოპერაციისას მოკლული თემირლან მაჩალიკაშვილის ადვოკატი, მარიამ კუბლაშვილი.
ის აღნიშნულ საქმეზე ექსპერტიზის შედეგებს ერთი კვირს წინ გაეცნო, თუმცა, დღეს, ექსპერტ ზაზა ალთუნაშვილთან ერთად კიდევ ერთხელ შეაჯამა შედეგები. როგორც კუბლაშვილი აცხადებს, ექსპერტიზის შედეგად, ხელყუმბარაზე მაჩალიკაშვილის თითის ანაბეჭდი ვერ აღმოაჩინეს.
„დაქტილოსკოპიური ექსპერტიზის შედეგის მიხედვით, ხელყუმაბარაზე თემირლან მაჩალიკაშვილის ნათითურების კვალი აღმჩენილი არ არის“, - აცხადებს ადვოკატი.
საპირისპროს დამტკიცებას ცდილობს ოთხი თვეა, საქართველოს უსაფრთხოების სამსახური. მათი მტკიცებით, სპეცრაზმელმა მაჩალიკაშვილს იმის გამო ესროლა, რომ მას ხელში ხელყუმბარა ჰქონდა და სამართალდამცველების აფეთქებას აპირებდა.
„ვალდებულები არიან, დამიმიტკიცონ, რომ მაჩალიკაშვილს ხელში ხელყუმბარა ეჭირა, რასაც ვერაფრით დამიმტკიცებენ. ასე რომ იყოს, ხელყუმბარაზე მაჩალიკაშვილის ნათითურები უნდა აღმოჩენილიყო. ვამტკიცებ, რომ მაჩალიკაშვილს ხელში ხელყუმაბარა კი არა, ტელეფონი ეჭირა. ამასთან დაკავშირებით, მტკიებულებაც მაქვს წარდგენილი, სანამ სროლა მოხდებოდა, მაჩლიკაშვილმა ბიძაშვილს 5 წუთით ადრე, შეტყობინება გაუგზავნა. ფაქტია, რომ მას ხელში ტელეფონი ეჭირა“, - აცხადებს კუბლაშვილი.
ცნობისთვის, თემირლან მაჩალიკაშვილი პანკისში, სპეცოპერაციის დროს დაიჭრა და უგონო მდგომარეობაში რამდენიმე დღის განმავლობაში იმყოფებოდა, 11 იანვარს კი საავადმყოფოში გარდაიცვალა.
სუსის ინფორმაციით, პანკისის ხეობასა და თბილისში ჩატარებული სპეცოპერაციის დროს დაკავებული ხუთი მოქალაქე დაეხმარა აჰმედ ჩატაევს საქართველოს საზღვარზე გადმოსვლაში. დაკავებული პირები 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსზე.