„ეს ახალგაზრდა თვითმფრინავში სრულიად ჯანმრთელი ავიდა. თვითმფრინავი ნახევარი საათის განმავლობაში ვერ დაიძრა, რადგან ვენტილაციის პრობლემები იყო. ამ ნახევარი საათის განმავლობაში, ხუდოევი კარგად იყო, თუმცა, შემდეგ, სუნთქვის უკმარისობით ცუდად გახდა. ყურადღება მას შემდეგ მიაქციეს, რაც მგზავრებმა ატეხეს ყვირილი უშველეთო“, - აცხადებს „ჯი-ეიჩ-ენთან“ თვითმფრინავში გარდაცვლილი 28 წლის მურაზ ხუდოევის ოჯახის ადვოკატი, ირაკლი ჩომახაშვილი.
თუ რამ გამოიწვია თბილისი-სტამბოლის რეისზე ხუდოევის გარდაცვალება და დროული დახმარების შემთხვევაში შესაძლებელი იყო თუა რა მისი გადარჩენა, ამ კითხვებზე სამედიცინო ექსპერტმა უნდა გასცეს პასუხი. მანამდე კი, ადვოკატი განმარტავს, რომ ხუდოევი უყურადღებობას, მომსახურე პერსონალის არაკვალიფიციურობას და არასათანადო პირველად დახმარებას ემსხვერპლა.
„პერსონალმა ჟანგბადის ორი ბალონი მოიტანა, რომელიც გახსნისთანავე დაიცალა. ამის გარდა, შემთხვევის ადგილზე სასწრაფო სამედიცინო დახმარებას მისვლა საპატრულო ეკიპაჟმა დაასწრო. სასწრაფომ ნახევარი საათი, 40 წუთი დააგვიანა, როცა ისინი მივიდნენ, ეს ბიჭი გარდაცვლილი იყო. მგზავრებიც ამბობდნენ, თქვენი დაუდევრობით მოკალით ეს ადამიანიო. აბსოლუტურად ყველა დაბნეული იყო და აღნიშნული სიტუაციიდან გამოსავალს ვერ პოულობდნენ. თვითმფრინავში სამედიცინო დახმარების ყუთი არ ჰქონდათ, რითიც იმ ადამიანს დაეხმარებოდნენ, წამალს მიაწოდებდნენ.
როგორც თვითმხილველები აცხადებენ, პერსონალი ჟანგბადის ბალონის გამოყენების დროს დაიბნა. ამის გარდა, მხოლოდ ჟანგაბდის ბალონი ჰქონდათ, რომელიც ვერც გაუკეთეს, მაშინვე დაიცალა. არანაირი მედიკამენტი არ გამოყენებულა.
წარმოიდგინეთ, თვითმფრინავი აფრენილიც არ იყო, ჰაერში რომ ვინმე გამხდარიყო ცუდად, სანამ არ დაჯდებოდა, სასწრაფო დახმარების ბრიგადა ხომ ვერ მივიდოდა? გამოდის, რომ „პეგასუსს“ სტანდარტული პრობლემა აქვს, რადგან თვითმფრინავში პირველადი დახმარების არანაირი საშუალება არსებობდა, ეს ადამიანი ფაქტობრივად, დაუდევრობით გარდაიცვალა“, - აცხადებს ჩომახაშვილი.
ხუდოევის ოჯახის სამედიცინო ექსპერტიზის შედგებს ელოდება. ისინი დამნაშავის კანონის შესაბამისად დასჯას მოითხოვენ.
„სამედიცინო ექსპერტიზა დანიშნულია, შედეგებს 30-40 დღის ვადაში ველოდებით, რომელმაც უნდა დაადგინოს, თუ რამ გამოიწვია სიკვდილი. სამედიცინო დახმარებას კი უწერია, რომ გულის შეტევით გარდაიცვალა, თუმცა, ჩვენთვის მნიშვნელოვანია, დავადგინოთ, თუ რამ გამოიწვია სიკვდილი.
პასუხისმგებელი ყველა ვარიანტში, თავად ავიაკომპანიაა, მაგრამ კონკრეტული პირი უნდა გამოიკვეთოს, რომ მის მიმართ სისხლის სამართლებრივი დევნა დაიწყოს, როგორც გაუფრთხილებლობით სიცოცხლის მოსპობის მუხლით, ასევე, სხვა ნებისმიერი მუხლით, რომელიც სტანდარტების დარღვევას გულისხმობს, რამაც ადამიანის სიცოცხლის მოსპობა გამოიწვია“, - აცხადებს ჩომახაშვილი.
მომხდართან დაკავშირებით, ავიაკომპანიაში კომენტარს გამოძიების დასრულებამდე არ აკეთებენ.
შემთხვევა 13 აპრილს, გამთენიისას მოხდა. ხუდოევი თვითმფრინავის დაძვრისთანავე გახდა ცუდად და 10 წუთში გარდაიცვალა.
ცნობისთვის, სამოქალაქო ავიაციის სააგენტოს მიერ, საქართველოში რეგისტრირებული ავიაკომპანიების მიმართ დადგენილია შემდეგი სტანდარტები:
ექსპლუატანტი ვალდებულია, სხ აღჭურვოს სამედიცინო დახმარების კომპლექტებით. მათ შორის პირველადი სამედიცინო დახმარების აფთიაქით, რომელიც უნდა უნდა განთავსდეს სამგზავრო სალონში, ბორტგამყოლებისათვის ადვილად ხელმისაწვდომ ადგილას. სამედიცინო დახმარების კომპლექტის რაოდენობა არ უნდა იყოს ნაკლები:
ა) ორზე - 100- 199 -მდე სამგზავრო ადგილის მქონე სხ-ისათვის;
ბ) სამზე - 200 - 299 -მდე სამგზავრო ადგილის მქონე სხ-ისათვის;
გ) ოთხზე - 300 და მეტი სამგზავრო ადგილის მქონე სხ-ისათვის.
იმ სხ-ზე, სადაც არის 30-ზე მეტი სამგზავრო ადგილი და ფრენა იგეგმება 1სთ-ზე უფრო მეტ საფრენ მანძილზე, უნდა იდოს გადაუდებელი დახმარების აფთიაქი. მისი გამოყენება შეუძლია კვალიფიცირებულ ექიმს ან კვალიფიცირებულ სამედიცინო პერსონალს. იგი დაცული უნდა იყოს მტვრისა და ნესტისაგან. უნდა იდოს მგზავრებისათვის მიუწვდომელ ადგილზე.
ექსპლუატანტი ვალდებულია უზრუნველყოს ორივე სამედიცინო კომპლექტის შიგთავსის პერიოდული შემოწმება და შევსება, ვარგისობის ვადების მიხედვით.
