„ამ ექსპერტიზის დასკვნით, არ დგინდება და ვერც დადგინდება თუ რამდენი დანა იყო გამოყენებული. ექსპერტიზა გვეუბნება შესაძლებობას, ჭრილობისას რა სახის დანა ან მჩხვლეტავი საგანი შესაძლოა ყოფილიყო გამოყენებული. მაგრამ საქმეში ორი დანა რომ ფიგურირებს, დადასტურებულია არამხოლოდ ამ ექსპერტიზის დასკვნით, არამედ სხვა დასკვნებითაც, მათ შორის, დნმ-ის ექპერტიზის დასკვნით და მოწმეების ჩვენებითაც“, - განაცხადა ჟურნალისტებტან პროცესის დასრულების შემდეგ, ხორავას ქუჩაზე მოზარდებს შორის მომხდარი მკვლელობის საქმის პროკურორმა, ზვიად ფხაკაძემ.
დღევანდელ სასამართლო სხდომაზე ბრალდების მხარის მოწმეები დაიკითხნენ, მათ შორის, გამომძიებელი, რომელმაც აღნიშნულ საქმეზე საგამოძიებო მოქმედებები ჩაატარა.
„რამდენიმე მოწმემ ხორავას ქუჩაზე განვითარებული ფაქტობრივი გარემოებების თაობაზე ისაუბრა. მოწმეთა შორის ასევე იყო, გამომძიებელი, რომელმაც მოცემულ სისხლის სამართლის საქმეზე უშუალოდ ჩაატარა რიგი საგამოძიებო მოქმედებები, ასევე მისი მონაწილეობით ჩატარებულ იქნა ფარული საგამოძიებო მოქმედება, კერძოდ, ხორავას ქუჩაზე მონაწილე პირთან განახორციელა ფარული აუდიო ჩაწერა, რაც ასევე დაერთო სისხლის საქმეს. ამ საგამოძიებო მოქმედებაში ასევე, მონაწილეობდა კონკრეტული პირის მშობელი. ხსენებული ფარული საგამოძიებო მოქმედება სასამართლოს წინა სხდომებზე იქნა გამოკვლეული, სადაც კონფლიქტის ერთ-ერთი მონაწილე საუბრობს, თუ რა ვითარებში, ვისა და ვის შორის მოხდა კონფლიქტი, რა და რამდენი დანა იქნა გამოყენებული.
ხსენებული პირი კონფლიქტის მონაწილეა და დეტალებზე საუბრობს. ის კონფქლიტის დაწყების დროდ ზუსტად იმას ასახელებს, რაც სასამართლო სხდომაზე, ასევე გამოძიების სტადიაზე, მოწმეთა გამოკითხვის ოქმებში და ჩვენებებშია დაფიქსირებული. ხსენებული პირი გარდა იმ დანებისა, რაც საქმეზეა ამოღებული, არ საუბრობს. ეს ისე არ გაიგოთ, თითქოს, მეტი დანა იყო და არ ამბობს, უბრალოდ სხვა დანებს არ აფიქსირებს“, - აცხადებს ფხაკაძე.
მისი განმარტებით, დადგენილია დანა, რომლითაც დავით სარალიძეს სასიკვდილო ჭრილობა მიაყენეს.
„იდენტიფიცირებულია ის დანა, რომლითაც მოხდა დავით სარალიძეზე სასიკვდილო ჭრილობის მიყენება, მაგრამ არ მინდა გაგებული იყოს, თითქოს მხოლოდ ეს ჭრილობა იყო სასიკვდილო. დავით სარალიძეზე არის რამდენიმე დაზიანება გულმკერდისა და მუცლის ღრუს არეში. ექსპერტის დასკვნით დასტურდება, რომ შესაძლებელია ეს დაზიანებები გამოწვეული ყოფილიყო არამარტო ამ დანით, რომელმაც სასიკვდილო დაზიანება გამოიწვია, არამედ სხვა დანითაც, მათ შორის იმ დანით, რაც გამოძიების სტადიაზე იქნა ამოღებული“, - განაცხადა ზვიად ფხაკაძემ.
როგორც ის განმარტავს, გუშინ დაზარალებულ ზაზა სარალიძეს შეხვდა და ექსპერტიზის შედეგები განუმარტა.
„დაზარალებულ ზაზა სარალიძეს შევხვდი გუშინ. შეხვედრას ესწრებოდა ასევე მისი ადვოკატი. ვისაუბრეთ მოცემულ ფაქტთან დაკავშირებით. მე მას განუმარტე, რომ ესქპერტიზას შეუძლია თქვას, შესაძლებელია ჭრილობები კონკრეტული საგნით, ან აღნიშნული საგნის მსგავსი საგნით იყო მიყენებული. ექპერტები მოვლენ სასამართლ;ო სხდომაზე და ისაუბრებენ, რა მოიაზრება სადაც „შესაძლებელია“ წერია იმაში და რა მოიაზრება, გამორიცხულია რომ არ შეიძლება მიყენებული იყოს ამ დანითო“, - აცხადებს ფხაკაძე.
შემდეგი სასამართლო სხდომა 28 აპრილს, 12:00 საათზე ჩაინიშნა.
ცნობისთვის, პირველ დეკემბერს, ხორავას ქუჩაზე, მოზარდებს შორის სისხლიან გარჩევას, ორი მოზარდის, დავით სარალიძისა და ლევან დადუნაშვილის სიცოცხლე ემსხვერპლა.