ჩვენ გვგონია, არარელევანტურია მოძალადეებსა და მსხვერპლებს შორის ამხანაგური მატჩის გამართვა, – ასე გამოეხმაურა ბელიაშვილის ქუჩის ინციდენტთან დაკავშირებით თბილისის მერის ინიციატივას უცხოელი სტუდენტების ადვოკატი შოთა თუთბერიძე.
მისი თქმით, სახელმწიფო აპარატი ახლა ორიენტირებული უნდა იყოს იმაზე, რომ გამოძიება სწრაფად და ეფექტურად ჩატარდეს და დამნაშავე პირები მიეცნენ პასუხისგებაში და ორიენტირებული არ უნდა იყოს დანაშაულის ჩაფარცხვაზე.
„კახა კალაძის განცხადებამ გაგვაკვირვა, ცოტა კომიკური გვეჩვენება, იქიდან გამომდინარე, რომ სახელმწიფო აპარატი ახლა ორიენტირებული უნდა იყოს იმაზე, რომ გამოძიება სწრაფად და ეფექტურად ჩატარდეს და დამნაშავე პირები მიეცნენ პასუხისგებაში და ორიენტირებული არ უნდა იყოს დანაშაულის ჩაფარცხვაზე.
ამიტომ, სერიოზულად ვერ განვიხილავთ კალაძის ინიციატივას. ჩვენ გვგონია, არარელევანტურია მოძალადეებსა და მსხვერპლებს შორის ამხანაგური მატჩის გამართვა.
მე ვესაუბრე ნაწილს და ისინი ამბობენ, რომ მათთვის კომიკურია ეს განცხადება“, – განაცხადა თუთბერიძემ.
ცნობისთვის, კალაძის ინიციატივით, აფრიკელ სტუდენტებსა და ადგილობრივებს შორის იმავე მოედანზე, ამხანაგური მატჩი გაიმართება.
შეგახსენებთ, თბილისში, ბელიაშვილის ქუჩაზე, შავკანიანი სტუდენტების ცემის ფაქტზე შინაგან საქმეთა სამინისტრომ გამოძიება დაიწყო. უწყების ინფორმაციით, მომხდართან დაკავშირებით გამოძიება სსკ-ის 126-ე, ძალადობის მუხლით მიმდინარეობს.
