"ოცნების" ეს კრედო - ჩვენ ჰუმანურები ვართ, ჩვენ არავის დასჯა გვინდა - ახალისებს დაუსჯელობას, - ასე ეხმაურება "ევროპული საქართველოს" წევრი ზურაბ ჭიაბერაშვილი დედაქალაქის მერის კახა კალაძის ინიციატივას, რომლის თანახმადაც აფრიკელ სტუდენტებსა და ადგილობრივებს შორის იმავე მოედანზე, სადაც დაპირისპირება მოხდა, ამხანაგური მატჩი გაიმართება.
როგორც ჭიაბერაშვილი Facebook-ის პირად გვერდზე წერს, ეს კრედო ამცირებს მანძილს იმ მომენტამდე, როდესაც სიძულვილის ტალღა ერთეულებს კი არა, ათასებს გადაუვლის და დააზარალებს.
"ქმარი რომ ცოლს სცემს, ერთკვირიანი ოჯახური "პუწიოვკა" ავუღოთ და შესარიგებლად სადმე პიატიგორსკში გავუშვათ.
სერიოზულად კი, "ოცნების" ეს კრედო - ჩვენ ჰუმანურები ვართ, ჩვენ არავის დასჯა გვინდა - ახალისებს დაუსჯელობას და ამცირებს მანძილს იმ მომენტამდე, როდესაც სიძულვილის ტალღა ერთეულებს კი არა, ათასებს გადაუვლის და დააზარალებს", - წერს ჭიაბერაშვილი.
ცნობისთვის, თბილისში, ბელიაშვილის ქუჩაზე, შავკანიანი სტუდენტების ცემის ფაქტზე შინაგან საქმეთა სამინისტრომ გამოძიება დაიწყო. უწყების ინფორმაციით, მომხდართან დაკავშირებით გამოძიება სსკ-ის 126-ე, ძალადობის მუხლით მიმდინარეობს.
