ძალიან დიდი იმედი მაქვს, რომ ეს არ იყო რასისტულ ნიადაგზე წარმოქმნილი კონფლიქტი, არამედ იყო ყოფითი ჩხუბი, რაც ყველა ადამიანს შორის შეიძლება მოხდეს, - ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ სოფო კილაძემ ბელიაშვილის ქუჩაზე მომხდარი ინციდენტთან დაკავშირებით განაცხადა.
მისი თქმით, არ შეიძლება, რომ უბრალოდ რაღაც კონკრეტულ შემთხვევას მაინც და მაინც რასისტული სარჩული დავუდოთ.
"მე მოვისმინე ორივე მხარის პოზიცია. ამ შემთხვევაში მე არა მაქვს საფუძველი, რომ ეჭვი შევიტანო იმაში, რასაც იქაური მცხოვრებლები ამბობენ, არც იმის საფუძველი მაქვს, რომ საწინააღმდეგო ვამტკიცო. ამიტომ ეს უნდა გადაწყვიტოს შესაბამისმა სამართალდამცავმა სტრუქტურებმა კონკრეტულ ინფორმაციაზე დაყრდნობით. არ შეიძლება, რომ უბრალოდ რაღაც კონკრეტულ შემთხვევას მაინც და მაინც რასისტული სარჩული დავუდოთ. ეს ძალიან საფრთხილო თემაა და მე ძალიან დიდი იმედი მაქვს, რომ ეს არ იყო რასისტულ ნიადაგზე წარმოქმნილი კონფლიქტი, არამედ იყო ერთი ყოფითი ჩვეულებრივი საკითხი, ჩხუბი, რაც ყველა ადამიანს შორის შეიძლება მოხდეს", - განაცხადა კილაძემ.
ცნობისთვის, თბილისში, ბელიაშვილის ქუჩაზე, შავკანიანი სტუდენტების ცემის ფაქტზე შინაგან საქმეთა სამინისტრომ გამოძიება დაიწყო. უწყების ინფორმაციით, მომხდართან დაკავშირებით გამოძიება სსკ-ის 126-ე, ძალადობის მუხლით მიმდინარეობს.
