მოსამართლეს კანონით აქვს უფლება, დღესაც გამოაცხადოს განაჩენი, მაგრამ ამ [ციანიდის] საქმის სირთულიდან და მოცულობიდან გამომდინარე, განაჩენს დღეს არ უნდა ველოდოთ, - ამის შესახებ დეკანოზ გიორგი მამალაძის ადვოკატმა გიორგი ფანცულაიამ თბილისის სააპელაციო სასამართლოში ჟურნალისტებს განუცხადა.
მისი თქმით, პროცესს დეკანოზი გიორგი მამალაძეც დაესწრება, რომელიც საბოლოო სიტყვას გამოიყენებს.
"ჩვენ მზად ვართ, რომ ჩვენი პოზიცია სასამართლოს ამომწურავად მივაწოდოთ. ჩვენი დასკვნითი სიტყვა მოცულობითია, რამდენიმე ათეული ფურცლისგან შედგება და ალბათ რამდენიმე საათს გასტანსა. ჩვენ დასკვნით სიტყვაში განხილულია, როგორც საქალაქო სასამართლოში მიმდინარე პროცესები, ასევე ახალი გარემოებები, რომელიც სააპელაციო სასამართლოში დაემატა. ნომერ პირველი უფლებადამცველის, სახალხო დამცველის დასკვნაც დაემატა, რომელმაც განაცხადა, რომ საქალაქო სასამართლოში მართლმსაჯულება არ აღსრულდა. ჩვენ გვექნება მიმოხილული მთლიანი საქმეც, ამის შემდომ იქნება მხარეთა რეპლიკები, რომელიც ძალიან მცირე დროს წაიღებს. დღეს დეკანოზი მამალაძე სასამართლოში მობრძანდება, ის წინა პროცესზე სასამართლოს პროტესტს უცხადებდა, თუმცა, ის დღეს საბოლოო სიტყვას აუცილებლად გამოიყენებს. მის მიმართ უკანონო ქმედებები, თითქმის ერთი წელია გრძელდება, მოგეხსენებათ, ის 10 თებერვალს დააკავეს. ის ქართული მართლმსაჯულების უკანონო პატიმარია. დღეს სააპელაციო სასამართლოში საქმის განხილვები დასრულდება. მოსამართლეს კანონით აქვს უფლება, დღესაც გამოაცხადოს განაჩენი, მაგრამ ამ საქმის სირთულიდან და მოცულობიდან გამომდინარე, განაჩენს დღეს არ უნდა ველოდოთ", - განაცხადა გიორგი ფანცულაიამ.
ცნობისთვის, თბილისის სააპელაციო სასამართლოში გიორგი მამალაძის საქმის განხილვა დაიწყო. დეკანოზი დღეს სასამართლოზე საბოლოო სიტყვას წარმოთქვამს.
შეგახსენებთ, დეკანოზი გიორგი მამალაძე თბილისის საქალაქო სასამართლომ 5 სექტემბერს, პატრიარქის მდივან-რეფერენტის, შორენა თეთრუაშვილის განზრახ მკვლელობის მომზადებისთვის გაასამართლა.
