საკუთარი მამა და შვილებიც რომ იყვნენ დამნაშავეები, რომლებიც გამოიკვეთებიან, კანონის წინაშე აგებენ პასუხს, - ამის შესახებ თბილისის მერმა კახა კალაძემ მეტროსადგურ “ვარკეთილში“ მომხდარ ინციდენტზე საუბრისას განაცხადა.
როგორც ტელეკომპანია “პირველის“ ეთერში კალაძემ აღნიშნა, მომხდარს მკაცრი რეაგირება მოჰყვება.
“მე კომპანიას ხელს არ ვაფარებ. მას თავიანთი მოეკითხება, გამოძიება ყველაფერს დაადგენს, თუმცა, სრული პასუხისმგებლობით ვამბობ, რომ როცა ამ კომპანიამ ტენდერში მიიღო მონაწილეობა, შავ სიაში არ იმყოფებოდა. შავ სიაში რომ ყოფილიყო, ფიზიკურად ვერ მოახერხებდა ტენდერში მონაწილეობის მიღებას“, - განაცხადა კახა კალაძემ.
შეგახსენებთ, მეტროსადგურ „ვარკეთილის“ ქვედა მოსაცდელში დაკიდული ჭერის კონსტრუქცია ჩამოიშალა და 14 ადამიანი დაშავდა.
