თბილისის საკრებულოს ქონების მართვისა და საფინანსო-საბიუჯეტო კომისიის თავმჯდომარე ირაკლი ზარქუა დღეს მეტროსადგურ „ვარკეთილში“ მომხდარ უბედურ შემთხვევას გამოეხმაურა.
დეპუტატმა შემთხვევის შედეგად დაშავებულებს მალე გამოჯანმრთელება უსურვა და აღნიშნა, რომ დაზარალებულთა მკურნალობის ხარჯებს მთლიანად ჯანდაცვის სამინისტრო და თბილისის მერია აანაზღაურებენ. ირაკლი ზარქუას თქმით, ფაქტს უკომპრომისო რეაგირება მოჰყვება და ყველა ის პირი თუ კომპანია, რომელიც პასუხისმგებელია აღნიშნული სამუშაოების განხორციელებაზე, უმკაცრესად აგებს პასუხს. საკრებულოს წევრმა განმარტა, რომ გამოძიება საქართველოს სისხლის სამართლის კოდექსის 240-ე მუხლით უკვე დაწყებულია, რაც სამთო, სამშენებლო ან სხვა სამუშაოს წარმოებისას უსაფრთხოების ნორმების დარღვევას გულისხმობს.
„აქვე უნდა აღვნიშნოთ, რომ ასეთი შემთხვევების თავიდან ასაცილებლად, გარდაუვალია უფრო მაღალი სამშენებლო სტანდარტების დაწესება და ხარისხის მკაცრი კონტროლი. სამშენებლო სექტორში დაბალი სტანდარტების დაწესებამ, სანებართვო პირობების გაუქმებამ, გამარტივებამ შესაძლოა თავის დროზე რიგ დარგებში გარკვეული შედეგი მოიტანა, შეამცირა კორუფციული რისკები, თუმცა ამ ყველაფერს შედეგად სრული განუკითხაობა და სამშენებლო სექტორში ძალიან დაბალი სტანდარტების დამკვიდრება მოჰყვა “, - განაცხადა ირაკლი ზარქუამ.
მისი თქმით, დღეს ზემოხსენებული რისკფაქტორი მინიმალიზებულია, მმართველი გუნდი სამშენებლო სექტორში მაღალ სტანდარტებს აბრუნებს და ამ მხრივ, დღეიდან კიდევ უფრო მეტ ძალისხმევას წარმართავს.
„ჩვენ მოწოდებულები ვართ, რომ ამ შემთხვევიდან გამოვიტანოთ სწორი გაკვეთილი, გვქონდეს მაქსიმალურად ეფექტიანი, სისტემური რეაგირება, რათა მოვახდინოთ სხვა შესაძლო ფაქტების პრევენცია, მაღალ დონეზე დავიცვათ ჩვენი მოქალაქეების სიცოცხლე და უსაფრთხოება“, - აღნიშნა ირაკლი ზარქუამ.
