მძიმე დანაშაულებების გამოძიების ნაცვლად, ხელისუფლება საკანონმდებლო ცვლილებებზე საუბრობს, - განაცხადა ,,ევროპული საქართველოს“ წევრმა ირაკლი აბესაძემ ,,ქართული ოცნების“ მიერ დღეს დაანონსებულ საკანონმდებლო ცვლილებებთან დაკავშირებით, რომელსაც პირობითად ,,გირგვლიანის შესწორებები“ უწოდეს.
,,სისხლის სამართლის კოდექსში დაანონსებული ცვლილება, რომელიც თითქოს მართლმსაჯულების აღსრულებისთვის ხელის შეშლას დანაშაულად აცხადებს, მორიგი ფარსია. ეს ქმედება დღესაც დასჯადია. პრობლემა ისაა, რომ ქართული ოცნების ხელისუფლება სისხლის სამართლის კოდექსს არა დანიშნულებისამებრ, არამედ პოლიტიკური ოპონენტების წინააღმდეგ საბრძოლველად იყენებს. ქართული ოცნების მმართველობის პერიოდში უამრავი შემთხვევა გვახსოვს როცა ხელისუფლება მართლმსაჯულების განხორციელებას და ობიექტური ჭეშმარიტების დადგენას ხელს უშლიდა ან დღესაც უშლის. ამის მიუხედავად ჩვენ არ გვინახავს არცერთი დასჯილი მაღალჩინოსანი.
ამის კარგი მაგალითი თუნდაც მუხთარლის საქმე, სადაც გამოძიება ჩიხშია შესული და ხელისუფლება დამნაშავეების დასასჯელად არაფერს აკეთებს. მსგავსია ბირჟა მაფიის შემთხვევაც. სიმღერისთვის დასაჯეს მუსიკალური ჯგუფი და ეს საქმე დღესაც გამოუძიებელია. გვახსენდება ციხეში წამებით მოკლული კორტავას საქმეც. ყველა ამ შემთხვევაში ხელისუფლების მაღალჩინოსნები ხელს უშლიდნენ და უშლიან გამოძიებას.
ამ საქმეების გამოძიებას არ სჭირდება ცვლილებები სისხლის სამართლის კოდექსში. სიმართლის დადგენას სჭირდება ნება და კონკრეტული თანამდებობის პირების პასუხისმგებლობის დაყენება. ამას კი ქართული ოცნება არ აკეთებს“, - განაცხადა ირაკლი აბესაძემ.
ფრაქცია “ქართული ოცნების” თავმჯდომარის, მამუკა მდინარაძის განცხადებით, ფრაქცია იწყებს მუშაობას ახალ საკანონმდებლო პაკეტზე - “გირგვლიანის შესწორებები”.
,,ინიციტივათა ერთის მხრივ უზრუნველყოფს გაცილებით მაღალი სტანდარტით მოქალაქეთა დაცულობას სახელმწიფო ძალმომრეობისგან და მეორეს მხრივ უზრუნველყოფს მართლმსაჯულების ხელშეუვალობას - ეს იქნება ცვლილებების მთავარი არსი. რასაკვირველია, ახალი რეგულაცია ვერ გავრცელდება ძველ შემთხვევებზე და შეეხება მხოლოდ მოქმედ და მომავალ ხელისუფლებებს. ამ ცვლილებებს სიმბოლურად შეიძლება “გირგვლიანის შესწორებები” დავარქვათ”, - განაცხადა მდინარაძემ.
