საქართველოს ჰქონდა არნახული მონაპოვარი, როდესაც კრიმინალური სამყარო დამარცხდა უფრო ძლიერად, ვიდრე - მაფია იტალიაში, თუმცა "ქართული ოცნების" ხელისუფლებაში ყოფნის პერიოდში ეს შეიცვალა, - ამის შესახებ "ერთიანი ნაციონალური მოძრაობის" ლიდერმა რომან გოცირიძემ განაცხადა.
მისივე თქმით, თუ გააცნობიერეს, რომ ქურდულ სამყაროსთან ბრძოლის მიმართულებით ჩავარდნა აქვთ და ნაბიჯებს გადადგამენ, მისასალმებელია.
"საქართველოში დაბრუნდა კრიმინალური იდეოლოგია, ქურდული სამყარო. ჩვენ ვხედავთ რომ, დღეს ახალგაზრდები, ფაქტობრივად, უბრუნდებიან ქუჩურ გარჩევასა და სხვა კრიმინალურ მსოფლმხედველობას. თუ გააცნობიერეს, რომ ამ მიმართულებით ჩავარდნა აქვთ და რაღაც ნაბიჯებს გადადგამენ, რა თქმა უნდა, მისასალმებელია", - განაცხადა გოცირიძემ.
შს სამინისტროს ინფორმაციით, ქურდულ სამყაროსთან ბრძოლის მიმართულებით საკანონმდებლო ცვლილებები იგეგმება.
