ამერიკელ კონგრესმენთა ჯგუფი პრეზიდენტ ტრამპის იმპიჩმენტის ინიციატივით გამოდის. ამ საკითხთან დაკავშირებით დემოკრატმა კონგრესმენებმა სპეციალური პრესკონფერენცია გამართეს. მათ თეთრი სახლის ლიდერი კონსტიტუციის დარღვევაში, მართლმსაჯულებისთვის ხელის შეშლაში, უცხოური სახელმწიფოებისგან სახსრების უკანონო მიღებასა და თავისუფალი სიტყვის შეზღუდვაში დაადანაშაულეს.
საკანონმდებლო ინიციატივას სათავეში ტენესელი კონგრესმენი დემოკრატი სტივ კოენი უდგას. ტრამპის საწინააღმდეგო კამპანიაში ატიურადაა ჩართული დემოკრატების მეგა-დონორი ტომ სტეიერიც.
ტრამპის იმპიჩმენტის ინიციატივით კონგრესმენთა ჯგუფი ერთხელ უკვე გამოვიდა. ისინი ტრამპს ქალაქ შარლოტსვილში განვითარებულ მოვლენებზე არაადეკვატურ რეაგირებაში ადანაშაულებდნენ. როგორც იმპიჩმენტის ორგანიზატორები აცხადებდნენ, პრეზიდენტმა მემარცხენე და მემარჯვენე აქტივისტთა დაპირისპირების აღსაკვეტად სატანადო ზომები არ მიიღო.
