ესპანეთის პრემიერ-მინისტრი მარიანო რახოი კატალონიაში ჩავიდა. ეს მისი პირველი ვიზიტია ბარსელონაში, მას შემდეგ რაც მადრიდმა რეგიონის ავტონომიის დროებით გაუქმების გადაწყვეტილება მიიღო. ესპანეთის მთავრობის მეთაური მხარდამჭერებს შეხვდა და 21 დეკემბერს დანიშნულ ვადამდელ არჩევნებზე „სახალხო პარტიის“ კანდიდატები წარადგინა.
მისი განმარტებით, კატალონიელმა სეპარატისტებმა მას სხვა გზა არ დაუტოვეს, თუ არა დროებით შეზღუდოს ავტონომია. მისი თქმით, არჩევნების შემდეგ კატალონიაში „სეპარატისტული ქაოსი უნდა დასრულდეს“.
წუხელ, ბარსელონაში ასობით ათასმა დემონსტრანტმა კატალონიის ყოფილი ხელისუფლების მაღალჩინოსანთა გათავისუფლება მოითხოვა. ქალაქის ქუჩებში შეკრებილმა ათასობით აქტივისტმა მობილური ტელეფონის ეკრანი სიმბოლურად ერთდროულად გაანათა.
მომიტინგეები რვა ყოფილი მინისტრის და ორი აქტივისტის დაკავებას აპროტესტებდნენ. აქციის მონაწილეებს ხელში ეჭირათ ტრანსპარანტები წარწერით „კატალონია – რესპუბლიკაა“. „პუიჩდემონი პრეზიდენტად“ – სკანდირებდა ზოგიერთი დემონსტრანტი.
