"მინდა ყველას დიდი მადლობა გადაგიხადოთ, ძალიან ემოციური დღეა", - ამის შესახებ ქართული ოცნების თბილისის მერობის კანდიდატმა კახა კალაძემ "რუსთავი 2"-ის დაკვეთით ჩატარებული ეგზიტპოლის შედეგებზე დაყრდნობით განაცხადა, თუმცა დასძინა , რომ პატივი უნდა ვცეთ და დაველოდოთ შედეგებს, რომელსაც ცენტრალური საარჩევნო კომისია გამოაცხადებს.
„ძალიან ემოციური დღეა ჩემთვის. ჩვენ მოვისმინეთ წინასწარი შედეგები, თუმცა, პატივი უნდა ვცეთ ცენტრალურ საარჩევნო კომისიას, რომელიც დათვლის ხმებს და ოფიციალურად გამოცხადდება შედეგები. თუმცა, ჩვენ ვიცოდით, რომ გავიმარჯვებდით. ძალიან დიდი მხარდაჭერა იყო, როცა მთელი საარჩევნო კამპანიის პროცესში გვქონდა შეხვედრები. ეს სულისკვეთება იგრძნობოდა ყოველდღიურ რეჟიმში. იგრძნობოდა ის იმედი, რომელიც ჩვენი დედაქალაქის მოსახლეობას ჰქონდა“ - განაცხადა კახა კალაძემ.
მან მადლობა გადაუხადა ამომრჩეველს, გუნდს, ოპონენტებსა და ყველას ვინც საარჩევნო კამპანიაში იყო ჩართული.
„ეს ძალიან დიდი, თავდაუზოგავი შრომა იყო, თუმცა უფრო მეტი გვაქვს გასაკეთებელი და უფრო მეტი შრომა მოგვიწევს. ძალიან ბევრი პრობლემაა, რომელსაც სჭირდება მოგვარება, შესაბამისად, ყოველი დღე იქნება გამარჯვების დღე იმ პრობლემებზე, იმ ტკივილზე რომელიც დედაქალაქის მოსახლეობას აქვს“ - განაცხადა მერობის კანდიდატმა.
