დღეს არის შანსი და ალბათობა იმის, რომ შევცვალოთ „ქართული ოცნება“, - ამის შესახებ ჟურნალისტებს „ერთიანი ნაციონალური მოძრაობის“ ერთ-ერთმა ლიდერმა ნიკა მელიამ განუცხადა, რომლმაც საკუთარი არჩევანი თვითმმართველობის არჩევნებზე თბილისში, მთაწმინდის N6 საარჩევნო უბანზე დააფიქსირა.
მისი თქმით, ყველაზე მთავარია, საქართველოს ყველა მოქალაქე უკლებლივ გამოვიდეს საარჩევნო ურნებთან. მისივე თქმით, ეს არის ის მექანიზმი, რომელიც გაანეიტრალებს ყველა გაყალბების სქემას.
„არ მგონია, რომ დარჩა მოქალაქე, რომელიც ვერ აცნობიერებს ამ არჩევნების მნიშვნელობას. ყველაზე მთავარია, საქართველოს ყველა მოქალაქე უკლებლივ გამოვიდეს საარჩევნო ურნებთან. ეს არის ის მექანიზმი, რომელიც გაანეიტრალებს ყველა გაყალბების სქემას. თუკი იქნება მაღალი აქტივობა, ვერცერთი მილიონი, ვერცერთი მილიარდერი და ვერანაირი გაყალბების მეთოდი ვერ იქნება წინააღმდეგობაში მისული ხალხის ნებასთან.
ამიტომ, მოვუწოდებ ყველა მოქალაქეს, გამოვიდეს საარჩევნო ურნებთან, რადგან ეს არჩევნები უნდა გახდეს გარდამტეხი მომდევნო ქვეყნის განვითარებისთვის. დღეს არის შანსი და ალბათობა იმის, რომ შევცვალოთ „ქართული ოცნება“ - განაცხადა ნიკა მელიამ.
ცნობისთვის, საქართველოში თვითმმართველობის არჩევნები მიმდინარეობს. მოქალაქეები მთელი ქვეყნის მასშტაბით 64 საკრებულოს 2 058 დეპუტატს და 64 მერს პირდაპირი წესით, 4 წლის ვადით აირჩევენ.
