საქართველოს იუსტიციის სამინისტროს სამოქალაქო რეესტრის სააგენტოს აპოსტილისა და ლეგალიზაციის სამმართველოს ხელმძღვანელი ლალი კალანდაძე, ესპანეთში გაემგზავრა, სადაც 29-30 ივნისს, მადრიდში დაგეგმილ ელექტრონული აპოსტილის საპილოტო პროგრამის მეექვსე საერთაშორისო ფორუმში მიიღებს მონაწილეობას.

ფორუმში მონაწილეობას იღებენ საქართველოს იმ უწყებათა წარმომადგენლები, რომლებიც სამოქალაქო რეესტრის სააგენტოსთან ერთად უზრუნველყოფენ ოფიციალური დოკუმენტების აპოსტილით დამოწმებას, განათლებისა და მეცნიერების სამინისტრო და საქართველოს უზენაესი სასამართლო.

ქალაქ მადრიდში ელექტრონული აპოსტილის საპილოტო პროგრამის მეექვსე საერთაშორისო ფორუმს დაესწრება ჰააგის კონვენციის წევრი-ქვეყნების წარმომადგენლები მათ შორის საქართველოს მხარე. Hჰააგის კონვენციის წევრი ქვეყნები ერთმანეთთან მიმართებაში იყენებენ აპოსტილით დამოწმებულ დოკუმეტებს, მაგრამ საქართველოსთან მიმართებაში არსებობს დათქმა, რომლის თანახმადაც ჰააგის კონვენციის წევრი საქართველო და საბერძნეთი იყენებენ ლეგალიზებულ დოკუმენტებს.
ფორუმზე სამოქალაქო რეესტრის სააგენტოს აპოსტილისა და ლეგალიზაციის სამმართველოს ხელმძღვანელი ლალი კალანდაძე მოხსენებას გააკეთებს ყველა იმ ცვლილებაზე, რომელიც განიცადა აპოსტილით დამოწმების პროცედურამ 2009 წლის 15 ივლისიდან - მას შემდეგ რაც ეს ფუნქცია სამოქალაქო რეესტრის სააგენტოს გადაეცა.
აღსანიშნავია, რომ 2009 წლის 15 ივლისიდან უცხო ქვეყანაში წარსადგენად საქართველოში გაცემული ოფიციალური დოკუმენტების აპოსტილით დამოწმება და ლეგალიზაცია გამარტივდა.

იუსტიციის სამინისტროს ცენტრალური აპარატის ნაცვლად, დოკუმენტების ლეგალიზაცია და აპოსტილით დამოწმება შესაძლებელია სამოქალაქო რეესტრის სააგენტოს ოფისებში: თბილისში - სამოქალაქო რეესტრში (2009 წლიდან), ქუთაისში (2010 წლის აპრილიდან) და ბათუმში (2010 წლის ივნისიდან).

დოკუმენტების ლეგალიზებისა და აპოსტილით დამოწმებისათვის განისაღვრა 10-დღიანი ვადა. ამასთან, დაინერგა დაჩქარებული მომსახურება - შესაბამისი საფასურის გადახდის შემთხვევაში მოქალაქეს შეეძლება აპოსტილით დამოწმებული დოკუმენტი იმავე, მეორე და მეხუთე დღეს მიიღოს.

სამოქალაქო რეესტრის სააგენტო, ერთი ფანჯრის პრინციპის გათვალისწინებით, მოქალაქეებს სთავაზობს ახალ მომსახურებას - აპოსტილით დამოწმებული დოკუმენტების ადგილზე თარგმნას და თარგმანის დამოწმებას.

საქართველოში გაცემული და დამოწმებული დოკუმენტების სანდოობის ხარისხის ასამაღლებლად შეიქმნა ახალი დამცავი მექანიზმი - ელექტრონული ჟურნალი. აპოსტილის სტიკერზე მითითებულ ვებგვერდზე უცხო ქვეყნის ორგანოებს, რომელთაც წარედგინებათ საქართველოში დამოწმებული დოკუმენტი, შეუძლიათ სააგენტოს ვებგვერდის საშუალებით, აპოსტილის უნიკალური ნომრის მიხედვით გადაამოწმონ მისი ნამდვილობა.