სისხლის სამართლის საერთაშორისო სასამართლომ (ICC) განაცხადა, რომ აშშ-ის პრეზიდენტ დონალდ ტრამპის მიერ დაწესებული სანქციები ძირს უთხრის სასამართლოს ფუნქციონირებას.
"ICC გმობს განკარგულების ხელმოწერას, რომელიც ითვალისწინებს სანქციების დაწესებას სასამართლოს ოფიციალურე პირებზე და ძირს უთხრის მის დამოუკიდებელ და მიუკერძოებელ მუშაობას", - ნათქვამია განცხადებაში.
აღნიშნულია, რომ სასამართლო სანქციების მიუხედავად სამუშაოს გაგრძელებას აპირებს.
შეგახსენებთ, აშშ-ის პრეზიდენტმა დონალდ ტრამპმა ხელს მოაწერა აღმასრულებელ განკარგულებას სისხლის სამართლის საერთაშორისო სასამართლოს წინააღმდეგ სანქციების დაწესების შესახებ.
თეთრი სახლის ცნობით, ამის მიზეზი ის არის, რომ სასამართლოს მიზანში ჰყავს ამოღებული აშშ და მისი მოკავშირეები, მათ შორის ისრაელი.
განკარგულების თანახმად, აშშ ფინანსურ და სავიზო სანქციებს დააწესებს იმ პირებისა და მათი ოჯახის წევრების წინააღმდეგ, რომლებიც ხელს უწყობენ ICC-ის გამოძიებებს აშშ-ის მოქალაქეების ან მისი მოკავშირე ქვეყნების მოქალაქეთა წინააღმდეგ.
იუწყებიან, რომ სისხლის სამართლის საერთაშორისო სასამართლომ უკვე მიიღო ზომები თანამშრომლების დასაცავად სანქციებისგან, მათ შორის, სამი თვის ხელფასის წინასწარ გადახდით.
10 იანვარს აშშ-ს კონგრესის წარმომადგენელთა პალატამ სისხლის სამართლის საერთაშორისო სასამართლოს (ICC) მიერ ისრაელის პრემიერმინისტრ ბენიამინ ნეთანიაჰუს და თავდაცვის ყოფილი მინისტრის, იოავ გალანთის დაპატიმრების ორდერების გაცემის გამო, სასამართლოს წინააღმდეგ სანქციების დაწესებას მხარი დაუჭირა.
