ლუქსემბურგის საგარეო საქმეთა მინისტრი ევროკავშირიდან უნგრეთის გარიცხვას მოითხოვს. ჟან ასელბორნის განცხადებით, უნგრეთი ევროკავშირის ფუნდამენტურ ღირებულებებს ვერ პასუხობს. „პრემიერ ორბანის მსგავსი ადამიანები გვაიძულებენ ვიფიქროთ, რომ ევროკავშირი, რომელიც საერთო ღირებულებებს უნდა იცავდეს, მათ შესრულებას თავად ვერ უზრუნველყოფს“, - აღნიშნა ასელბორნმა გაზეთ „ველტთან“ ინტერვიუში. ლუქსემბურგის საგარეო უწყების ხელმძღვანელის თქმით, დღეს უნგრეთს ევროკავშირში გაწევრიანების შანსიც არ ექნებოდა, რადგანაც ლტოლვილების შესაჩერებლად ხელოვნურ ბარიერებს აგებს და პრესისა და სასამართლოს დამოუკიდებლობას არ უზრუნველყოფს. ლისაბონის ხელშეკრულება წევრი ქვეყნის დროებით ჩამოშორების მექანიზმს ითვალისწინებს, მაგრამ საამისოდ ევროპის საბჭოს ერთსულოვანი გადაწყვეტილებაა საჭირო.
