"ქრისტიან-დემოკრატიული მოძრაობის" ლიდერი გიორგი თარგამაძე და თბილისის მერობის კანდიდატი გია ჭანტურია საარჩევნო კამპანიის ფარგლებში დღეს მარნეულის მოსახლეობას შეხვდნენ.
პარტიის წევრებმა მათ საკუთარი საარჩევნო პროგრამა გააცნეს და რაიონში მოძრაობის მაჟორიტარი დეპუტატობის კანდიდატები წარუდგინეს.
"ქრისტიან-დემოკრატებს" მარნეულის 18 საარჩევნო ოლქიდან საკუთარი წარმომადგენელი 14 ოლქში ეყოლება.
თარგამაძის გუნდის პრიორიტეტი სხვა რაიონების მსგავსად, მარნეულშიც დასაქმებასა და დაბალ ტარიფებს უკავშირდება.
"ნორმალური ცხოვრება უნდა ყველას - ქართველსაც და აზერბაიჯანელსაც. ჩვენი მიზანი საქართველოში მცხოვრები თითოეული მოქალაქის უკეთესი მომავალია. ამიტომაც, ქართველი, აზერბაიჯანელი, სომეხი თუ სხვა ეთნიკური უმცირესობის წარმომადგენელი "ქრისტიან-დემოკრატიულ მოძრაობას" თანაბრად გულშემატკივრობს", - განუცხადა ჟურნალისტებს გიორგი თარგამაძემ.
