ივანე ჯავახიშვილის სახელობის თბილისის სახელმწიფო უნივერსიტეტის სტუდენტური თვითმმართველობის მესამე მოწვევის არჩევნებში, წინასწარი შედეგების მიხედვით, "ერთიანი სტუდენტური მოძრაობა" ლიდერობს.
როგორც "ჯი-ეიჩ-ენს" თსუ-დან აცნობეს, "ერთიანმა სტუდენტურმა მოძრაობამ" ხმათა 95 % მიიღო.
საერთო ჯამში, არჩევნებში საკუთარი პოზიცია 17 565-მა სტუდენტმა დააფიქსირა. მათი აქტივობა დაახლოებით 27%-ს შეადგენდა.
ცესკოს თავჯდომარის დავით ჯიქიას განცხადებით, არჩევნებმა მშვიდ ვითარებაში ჩაიარა.
"დაფიქსირდა რამდენიმე ტექნიკური ხარვეზი უბნების გახსნისას, თუმცა ჩვენ მოვახერხეთ მათი დროული აღმოფხვრა და მთლიანობაში არჩევნები დათქმულ ვადაში, ყველა წესის დაცვით ჩატარდა", - აღნიშნა ცესკოს თავჯდომარემ.
კანდიდატთა რეგისტრაციის ვადა 9 მაისს ამოიწურა. თსუ-ის სტუდენტური თვითმმართველობის ცენტრალურ საარჩევნო კომისიაში სულ 212 კანდიდატი იყო დარეგისტრირებული, საიდანაც 2 წლის ვადით თვითმმართველობის 110 წევრი შეირჩევა.
არჩევნებში "ერთიანი სტუდენტური მოძრაობის", "სტუდენტური ერთობის", სტუდენტური ჯგუფის "პირველების" წარმომადგენლები და დამოუკიდებელი კანდიდატები მონაწილეობდნენ.
არჩევნების ოფიციალური შედეგები ცნობილი 19 მაისს, დღის მეორე ნახევარში გახდება. შედეგების გამოცხადებიდან ერთ კვირაში კი, 110 დელეგატი თვითმმართველობის პრეზიდენტს დაასახელებს.
ივანე ჯავახიშვილის სახელობის თბილისის სახელმწიფო უნივერსიტეტში წინა არჩევნები 2008 წლის 8 მაისს ჩატარდა.
