"ალიანსი საქართველოსთვის" თბილისის მერობის კანდიდატი ირაკლი ალასანია და მაჟორიტარი დეპუტატობის კანდიდატი დავით ზალკალიანი სოფელ დიღმის მოსახლეობას შეხვდნენ.
"სოფელ დიღმის მოსახლეობა, ძირითადად, დაკავებულია მიწათმოქმედებით და ეს არის ძალიან კარგი. თუმცა, მათ ჯერ კიდევ არა აქვთ მფლობელობაში გადაცემული მიწები, რომლებსაც წლების განმავლობაში ამუშავებენ. ეს მოსახლეობის მიმართ არასამართლიანი მიდგომა და სწორედ ამის გამოსწორებას ვაპირებთ პირველ რიგში. ამდენი ხნის განმავლობაში ამ ადამიანებს პირდებოდნენ მიწების დაკანონებას, თუმცა - ამაოდ", - განაცხადა ალასანიამ და აქვე დასძინა, რომ სოფელში ასევე მოსაწესრიგებელია გზების და წყლის მიწოდების საკითხებიც.
ამასთან, ალასანიას თქმით, უნდობლობა, რომელიც საზოგადოებაში არჩევნებისა და დაპირებების მიმართ არსებობს, არის იმ ექვსწლიანი მმართველობის შედეგი, რომელიც აქვს "ერთიან ნაციონალურ მოძრაობას".
"არც ერთი დაპირება არ შეუსრულეს საზოგადოებას და ამან გამოიწვია სწორედ ქვეყანაში დიდი უიმედობა, კანდიდატებისა თუ პოლიტიკური პარტიების მიმარ დიდი უნდობლობა. ყველაფერი ეს ჩვენ უნდა შევცვალოთ 30 მაისს", - აღნიშნა მან.
