სეპარატისტული აფხაზეთის ოპოზიციის ერთ-ერთი ლიდერი რაულ ხაჯიმბა აფხაზეთში ნავთობის მოპოვებითი სამუშაოების წარმოებას ეწინააღმდეგება და აცხადებს, რომ შავ ზღვაზე ნავთობის მოპოვებითი სამუშაოები შესაძლოა ეკოლოგიური კატასტროფების კატალიზატორი გახდეს. ეს განცხადება ხაჯიმბამ "აფხაზეთის ერთიანობის სახალხო ფორუმზე" სიტყვით გამოსვლისას გააკეთა.
"მექსიკის ყურეში მომხდარი კატასტროფა ნათელი მაგალითია იმისა, რომ შავ ზღვაში ნავთობის მოპოვება ეკოლოგიური კატასტროფით შეიძლება დამთავრდეს. ამიტომაც ჩვენი ძალისხმევა მიმართული უნდა იყოს იმისკენ, რომ არ დავუშვათ ამ სამუშაოების წარმოება და მათი დაწყება", _ აცხადებს ხაჯიმბა.
მისივე თქმით, "აფხაზეთი ეკოლოგიურად მგრძნობიარე ტერიტორიაა და თუკი ჩვენ ამ ბალანსის დარღვევას დავიწყებთ, პირველ რიგში გავღარიბდებით ჩვენ თვითონ, შემდეგ კი ტურისტების მხრიდან ინტერესს დავკარგავთ", _ აცხადებს ხაჯიმბა.
შეგახსენებთ, რომ აფხაზეთის სანაპიროს შავი ზღვის შელფზე ნავთობმოპოვებითი სამუშაოების წარმოებას რუსული "როსნეფტი" აპირებს. სეპარატისტულ აფხაზეთსა და "როსნეფტის" ხელმძღვანელობას შორის შეთანხმება ამის შესახებ უკვე გაფორმებულია.
