საქართველოს ვიცე-პრემიერის, საგარეო საქმეთა მინისტრის გიორგი კვირიკაშვილის განცხადებით მონტენეგროს გაწევრიანების შესახებ გადაწყვეტილებით, ნატომ დაადასტურა, რომ ალინსის ღია კარის პოლიტიკა კვლავ შენარჩუნებულია, რაც ძალზედ მნიშვნელოვანია საქართველოსთვის.
„ნატო-ს მინისტერიალის კომუნიკეში აღნიშნულია, რომ მონტენეგროსთვის იღება ნატო-ში გაწევრიანების კარი, ეს ადასტურებს ნატოს ღია კარის პოლიტიკას, რაც საქართველოსთვის ძალზედ მნიშვნელოვანია. კომუნიკეში დადასტურებულია ის, რომ საქართველომ ძალიან მნიშვნელოვანი რეფორმები განახორციელა, როგორც სამხედრო კუთხით თავსებადობის ზრდის მიმართულებით, ასევე დემოკრატიული და პოლიტიკური სისტემის რეფორმირების მიმართულებით."
მინისტრის განცხადებით ასევე უაღრესად მნიშვნელოვანია, რომ საქართველოსთან დაკავშირებული საკითხები შევა ვარშავის სამიტის დღის წესრიგში და სამიტზე მიღებული იქნება ურთიერთქმედების გაღრმავების დამატებითი და ახალი კომპონენტები.
"აღინიშნა საერთაშორისო სამშიდობო ოპერაციებში მონაწილეობის მნიშვნელობა და რაც ყველაზე მთავარია, ხაზი გაესვა იმას, რომ რომ საქართველოს ნატოში გაწევრიანების გადაწყვეტილება არის ძალაში და ჩვენ, რა თქმა უნდა ამ მიმართულებით გავაძლიერებთ ძალისხმევას, რათა ეს საბოლოო მიზანი აუცილებლად იქნას მიღწეული"- განაცხადა გიორგი კვირიკაშვილმა.
მან ხაზი გაუსვა განცხადების იმ მნიშვნელოვან კომპონენტს, სადაც ალიანსი აღნიშნავს, რომ საქართველოს გააჩნია ყველა ინსტრუმენტი ნატო-ში გაწევრიანებისათვის. „არის ძალინ მნიშვნელოვანი ჩანაწერი, რომ საქართველოს გააჩნია ყველა აუცილებელი იარაღი, ინსტრუმენტი იმისათვის, რომ ნატო-ში გაწევრიანდეს. ეს ნიშნავს იმას, რომ გაწევრიანების სამოქმედო გეგმა, ანუ MAP-ი რჩება მხოლოდ და მხოლოდ პოლიტიკური გადაწყვეტილების გამოხატულებად".
საგარეო საქმეთა მინისტრი 1-2 დეკემბერს ბრიუსელში ნატო-ს მინისტერიალში მოანწილეობდა. მან ორმხრივი შეხვედრები გამართა კოლეგა მინისტრებთან და მონაწილეობა მიიღო ავღანეთში მტკიცე მხარდაჭერის მისიაში მონაწილე ქვეყნების საგარეო საქმეთა მინისტრების შეხვედრაში.
