ეკონომიკისა და მდგრადი განვითარების მინისტრი აცხადებს, რომ საქართველოსთვის მნიშვნელოვანია, ჩვენს მეზობლებს შორის ურთიერთობა არ იყოს დაძაბული. დიმიტრი ქუმსიშვილმა ამის შესახებ "როსსელხოზნადზორის" წარმომადგენლის ალექსეი ალექსეენკოს განცხადების კომენტირებისას განაცხადა, რომლის თანახმადაც თურქეთიდან ხილისა და ბოსტნეულის აკრძალვის ინფორმაციამ რუსეთის მეზობლები გაახარა.
,,ჩვენთვის მნიშვნელოვანია ჩვენს მეზობლებს შორის ურთიერთობა არ იყოს დაძაბული, არ მოხდეს ესკალაცია და პირიქით, რაც შეიძლება მალე ამოიწუროს კონფლიქტი", - განაცხადა დიმიტრი ქუმსიშვილმა.
შეგახსენებთ, რუსეთში თურქეთიდან ხილისა და ბოსტნეულის შეტანა აიკრძალება. "ამ ინფორმაციამ ხილისა და ბოსტნეულის შესახებ აშკარად გაახარა ჩვენი სხვა მეზობლები: იმიერკავკასია, სომხეთი. ეს ინფორმაცია ძალიან პოზიტიურად აღიქვა საქართველომ და აზერბაიჯანმა და ისინი არსებითად გაზრდიან თავისი პროდუქციის მიწოდებას. განსაკუთრებით ხარისხიანი პროდუქციის მოწოდებისთვის მზადაა ირანი", - განაცხადა ალექსეენკომ.
