საქართველოს საგარეო საქმეთა მინისტრის დავით დონდუას განცხადებით, მისი უწყებისთვის არსებობს ერთი კონფლიქტი და ეს რუსეთთან კონფლიქტია. ამის შესახებ დონდუამ ჟურნალისტებს პაატა ზაქარეიშვილის განცხადების კომენტირებისას განუცხადა, რომელიც აფხაზეთისა და სამაჩაბლოს კონფლიქტის მხარეებად აღიარებას შეხება.
,,ჩვენ ვართ საგარეო საქმეთა სამინისტრო და საგარეო საქმეთა სამინისტროსთვის მხარე არის რუსეთი, აფხაზები და ოსები ისევე არიან ოკუპირებული. ის სხვა უწყებაა და მე ჩვენი უწყების სახელით ვლაპარაკობ. ჩვენ არასდროს არ ვამბობთ - "კონფლიქტები", საგარეო საქმეთა სამინისტროს ყველა დოკუმენტში წერია ერთი კონფლიქტი - რუსეთთან, იმიტომ, რომ ეს არის საერთაშორისო კონფლიქტი", - განაცხადა დონდუამ.
მისივე თქმით, კონფლიქტის მხარეებად აღიარება, სტატუსის აღიარებას არ ნიშნავს.
,,ის, რომ პრობლემა გვაქვს ასევე აფხაზებთან და ოსებთან, ცხადია. შეიძლება ვთქვათ, რომ არ გვაქვს, მაგრამ რეალურად არის ხომ პრობლემა?! ამიტომ მათთანაც უნდა ვისაუბროთ. საუბარი არ ნიშნავს მათი სტატუსის აღიარებას. საუბარია იმაზე, რომ არ მოხდეს მათი სტატუსის აღიარება, თორემ კონფლიქტის მხარედ აღიარება არ ნიშნავს სტატუსის აღიარებას. ეს ჯერ კიდევ წინა ხელისუფლების დროს მიღებულ ჩართულობის სტრატეგიაში წერია, სადაც აფხაზეთი და ოსეთი არიან მოხსენებული მხარეებად კონფლიქტში", - აღნიშნა დონდუამ.
შეგახსენებთ, "კავკასიური სახლის" მიერ ორგანიზებულ დახურულ დისკუსიაზე "კონფლიქტების მოგვარების პოლიტიკა: ბოლო სამი წლის მიღწევები და გამოწვევები" შერიგებისა და სამოქალაქო თანასწორობის საკითხებში სახელმწიფო მინისტრმა პაატა ზაქარეიშვილმა აღნიშნა, რომ კონფლიქტის მხარეებად აღიარების შესახებ თავისი "სიტყვები უკან არ წაუღია და ამ მიმართულებით მუშაობს".
ამასთან, ზაქარეიშვილი ხაზს უსვამს, რომ რაიმე წერილობითი დეკლარაცია კონფლიქტის მხარეებად აღიარების შესახებ საჭირო არაა და ეს უნდა გამოიხატოს ორმხივ დოკუმენტებში, რადგან თავის მოტყუებაა ვთქვათ, რომ აფხაზური და ოსური მხარე არ არსებობს, როგორც კონფლიქტის მხარე.
