პარლამენტის ვიცე-სპიკერი გუბაზ სანიიკიძე მიიჩნევს, რომ ირაკლი შოთაძის ახალგაზრდული ასაკი მომგებიანია და მისი საქმიანობა გათვლილი უნდა იყოს პროკურატურის რეფორმაზე.
როგორც დღევანდელ პლენარულ სხდომაზე სანიკიძემ განაცხადა, „ეროვნული ფორუმი“ მთავარი პროკურორობის კანდიდატს მხარს დაუჭერს.
მისი თქმით, ძალიან მნიშვნელოვანია, რომ პროკურორი პარლამენტის მიერ ირჩევა და ეს ვადით ხდება.
„ირაკლი შოთაძის პერსონა ცხრა წლიან, სისხლიან მმართველობასთან რა კავშირშია, ვერ ამოვხსენი. ოპოზიცია სუბიექტური თუ ობიექტური მიზეზების გამო კანდიდატურის წინააღმდეგი იქნება. პროკურატურას სახელოვანი წარსული არ აქვს. პროკურატურის დამოუკიდებლობას არცერთი ხელისუფლება არ ცდილობდა. პროკურატურა მმართველი გუნდის დანამატი ყოველთვის იყო. პარლამენტის მიერ პროკურორის არჩევა ვითარებას ძირ-ფესვიანად ცვლის. პროკურორს ექვსი წელი ხმას უბატონოდ ვერავინ გასცემს და თავისულების ხარისხი ძალიან მაღალი იქნება. ირაკლის დიდი ხანი არ ვიცნობ, მაგრამ ამ ახალგაზრდა კაცმა ცვლილებები უნდა განახორციელოს და მისი ახალგაზრდული ასაკი მომგებიანია. მისი საქმიანობა გათვლილი უნდა იყოს პროკურატურის რეფორმაზე. ქართულ სამართალს სერიოზული რეფორმა და სტიმული სჭირდება. პროკურატურა ის მხარეა, რომელმაც სამართალს ახალი სტიმული უნდა მისცეს“, - განაცხადა სანიკიძემ.
შეგახსენებთ, ირაკლი შოთაძემ პროკურატურის სისტემაში კარიერა 2006 წლიდან დაიწყო. 2009 - 2010 წლებში ის მთავარი პროკურატურის ფინანსთა, გარემოს დაცვისა და ბუნებრივი რესურსების სამინისტროებში გამოძიების საპროცესო ხელმძღვანელობისა და უკანონო შემოსავლის ლეგალიზაციაზე სისხლისსამართლებრივი დევნის დეპარტამენტის პროკურორი იყო. 2010 წელს შოთაძემ კარიერა ფინანსთა სამინისტროს საგამოძიებო სამსახურში სხვადასხვა მაღალ თანამდებობებზე განაგრძო. მთავარი პროკურორის მოადგილედ იგი ოთარ ფარცხალაძის პროკურორობის დროს დაინიშნა.
