2012 წელს საქართველოს სასამართლოს მიერ გათავისუფლებული ახმედ ჩატაევი შეერთებულმა შტატებმა გლობალურ ტერორისტთა სიაში შეიყვანა. ჩატაევი ამ დროისთვის სირიაში ისლამური სახელმწიფოს ერთ-ერთ დაჯგუფებას ხელმძღვანელობს, თუმცა 3 წლის წინ საქართველოს ხელისუფლებამ პანკისის სპეცოპერაციის დროს დაკავებული ჩეჩენი მებრძოლი პატიმრობიდან გაათავისუფლა.
"გვქონდა ინფორმაცია ერთადერთი, რომ ის იყო ავსტრიის მოქალაქე და ლტოლვილის სტატუსი ჰქონდა. ჩვენი ადვოკატის მოვალეობებში არ შედიოდა გაერკვია ის, თუ რას აკეთებდა ის საქართველოში", -აცხადებს ადამიანის უფლებათა ცენტრის წარმომადგენელი ”კურიერთან” საუბარში.
შეგახსენებთ, რომ ახმედ ჩატაევი სამართალდამცავებმა 2012 წელს 28 აგვისტოს ლოპოტის ხეობაში ჩატარებული სპეცოპერაციის შედეგად დააკავეს. სპეცოპერაციას ემსხვერპლნენ როგორც პოლიციელები, ისე იმ ჯგუფის წევრები, რომლებიც შსს-მ შეიარაღებული დივერსანტების ჯგუფად გამოაცხადა.
რუსეთის ფედერაციის მოქალაქე ახმედ ჩატაევის დაკავების შესახებ განცხადება საქართველოს შინაგან საქმეთა სამინისტრომ 8 სექტემბერს გაავრცელა.
ჩატაევს ბრალი წაყენებული ჰქონდა სსკ–ის 236–ე მუხლის I და II ნაწილებით, რაც ასაფეთქებელი მოწყობილობების მართლსაწინააღმდეგო შეძენა, შენახვა, ტარებას გულისხმობს და სამიდან ხუთ წლამდე პატიმრობას ითვალისწინებს.
2012 წლის 6 დეკემბერს თბილისის საქალაქო სასამართლოს მოსამართლე ქეთევან ჯაჭვაძემ ახმედ ჩატაევს აღმკვეთი ღონისძიება - პატიმრობა შეუცვალა 5000- ლარიანი გირაოთი და დარბაზიდან გაათავისუფლა.
