საქართველოს სატრანზიტო პოტენციალში კორექტივები შედის, - განაცხადა „თავისუფალი დემოკრატების“ ფრაქციის სხდომაზე საქართველოს საგარეო საქმეთა მინისტრის მოადგილემ, დავით დონდუამ. მინისტრის მოადგილემ აღნიშნა, რომ 1-ელ სექტემბერს გაიმართა დახურული კონფერენცია, სადაც საუბარი იყო იმაზე, რა პროცესები მიდის ირანში, რასაც უშუალოდ შესაძლოა ჰქონდეს გავლენა საქართველოზე.
”გვქონდა საუბარი იმაზე, თუ რა პროცესები მიდის ამ ქვეყანაში, რასაც უშუალოდ შესაძლოა ჰქონდეს გავლენა საქართველოზე... ეს ყველაფერი როგორ აისახება ენერგეტიკულ უსაფრთხოებაზე. ნავთობზე ფასების დაცემა კარგია, მაგრამ მეორეა, ეს რა უჯდება აზერბაიჯანს, როგორ აისახება გაზის ფასზე, რომელიც დღეს ჩვენი მთავარი მომწოდებელია. ასევე, როგორ აისახება ირანის შემოსვლა როგორც ნავთობისა და გაზის ბაზარზე, ასევე საერთოდ ირანისთვის საზღვრების გახსნა... ამას აქვს პლუსები - ერთგვარად ხელს შეუწყობს რეგიონში ეკონომიკურ აქტიურობას. თუმცა, აქ ბევრი კითხვის ნიშანი, ბევრი რაღაც შეიძლება იყოს დასაფიქრებელი იმიტომ, რომ მთავარი ჩვენი რაც არის, სატრანზიტო პოტენციალი, ამაში შეიძლება რაღაც კორექტივები იყოს შეტანილი და მერე უცებ ეს ყველაფერი რაღაცა სიურპრიზად არ იყოს მიღებული”, - განაცხადა დონდუამ და აღნიშნა, რომ ამჟამად ყველაფერი კეთდება სისტემატიზაციისათვის.
”ჩვენ ამერიკელ კოლეგებთან მუდმივი საუბარი გვაქვს, რომლებიც გვთხოვენ, რომ ჯერჯერობით კიდევ თავი შევიკავოთ ირანთან სრულმასშტაბიანი თანამშრომლობისთვის. არათუ სრულმასშტაბიანი, არამედ საერთოდ გახსნისთვის, სანამ ყველა ის ვალდებულება, რომელიც ვენაში შეთანხმდა, არ იქნება შესრულებული და ირანს საბოლოოდ არ მიეცემა მწვანე შუქი”, - განაცხადა დონდუამ და აქვე აღნიშნა, რომ ირანი მალე გამოვა დეიზოლაციიდან და საქართველოს ამისთვის მზად უნდა იყოს.
”ჩვენ ვეუბნებით ამერიკას, რომ ჩვენ ერთგული ვართ იმ პოლიტიკის, იმ სანქციების, რასაც თქვენ და ევროკავშირი აწარმოებთ ირანში, მაგრამ უნდა გაითვალისწინოთ ჩვენი სპეციფიკაც. ირანი არის რეგიონალური სახელმწიფო. ირანი ჩვენი მნიშვნელოვანი პარტნიორია, როგორც ეკონომიკური, ასე სხვა მხრივ. ამიტომ, ჩვენ გარკვეული სამოძრაო სივრცეც გვინდა. არაერთხელ ყოფილა, რომ ჩვენს ამერიკელ კოლეგებს პირდაპირ მოუმართავთ რაღაცა შუამდგომლობისთვის გარკვეულ საკითხებზე. ამიტომ ვეუბნებით, რომ როდესაც ასეთ რაღაცას გვთხოვთ, ცოტა სამოძრაო სივრცეც უნდა დაგვიტოვოთ. იგივე ერთ-ერთ ავიაკომპანიაზე, რომელსაც საქართველოში შემოსვლა უნდოდა, გვთხოვეს, რომ თავი შეგვეკავებინა და ეს გავაკეთეთ. შემდეგ მეორე კომპანიაზე გვთხოვეს, რომელიც საერთოდ არ იყო სანქციების სიაში. თუმცა, ჩვენი პრაგმატული ინტერესებიდან გამომდინარე, ისე, რომ არ დაზარალებულიყო არც ევროპელ არც ამერიკელ პარტნიორებთან, ჩვენ ამ კომპანიას მოქმედების საშუალება მივეცით. ასე რომ, ამ მიმართულებით ჩვენ ვმუშაობთ. ირანი მალე გამოვა დეიზოლაციიდან, ამას ექნება გარკვეული გავლენა და ჩვენ ამისთვის მზად უნდა ვიყოთ”, - განაცხადა დონდუამ.
