შეწყალების კომისიის თავმჯდომარის ზვიად ქორიძის განცხადებით, გიორგი გვიჩიანისა და ნიკა ჩემიას შეწყალების სკითხი კომისიაზე ამ ეტაპზე, განხილული არ ყოფილა.
დღეს გამართულ პრესკონფერენციაზე მან განაცხადა, რომ სასჯელაღსრულების N8 დაწესებულებაში მყოფი გვიჩიანისა და ჩემიას განაცხადები შეწყალების საკითხთა კომისიაზე 2015 წლის ივნისში განიხილეს და დებულების თანახმად, მათ კომისიაში განცხადების შეტანის უფლება ოქტომბრის შემდეგ ისევ ექნებათ.
„დღეს გამოქვეყნდა გვიჩიანისა და ჩემიას განცხადება და ღია წერილი პრეზიდენტის სახელზე. შემიძლია დავადასტურო, გვიჩიანისა და ჩემიას განცხადება იყო განხილული შეწყალების საკითხთა კომისიაზე და შემდეგ პრეზიდენტთანაც იყო მსჯელობა ამის თაობაზე 2015 წლის ივნისში. მაშინ დადებითი გადაწყვეტილება არ იყო მიღებული. შესაბამისად, პროცედურების დაცვით, გვიჩიანსა და ჩემიას აქვთ უფლება შემოიტანონ შეწყალების თაობაზე განცხადება დებულებით დადგენილი ვადის გასვლის შემდეგ, ანუ ოქტომბრის შემდეგ და კომისია ისევ იმსჯელებს“, - განმარტა ზვიად ქორიძემ.
პატიმრები გიორგი გვიჩიანი და ნიკა ჩემია თავს უდანაშაულოდ მიიჩნევენ და აცხადებენ, რომ პრეზიდენტის მიერ შეწყალების აქტის გამოცემის იმედი ჰქონდათ, თუმცა, უშედეგოდ. ისინი პრეზიდენტისგან მათი დარღვეული უფლებების კონსტიტუციური დაცვის გარანტიებს ითხოვენ.
