ე.წ. კორტების სპეცოპერაციის საქმის განხილვა თბილისის საქალაქო სასამართლოში 8 ოქტომბერს გაგრძელდება.
პროცესზე დღეს ირაკლი ფირცხალავა დაცვის მხარემ დაკითხა, ხოლო პროკურატურამ დაკითხვა ვერ მოასწრო. შესაბამისად, მომდევნო პროცესი ფირცხალავას დაკითხვით გაგრძელდება.
საქმის პროკურორმა ამირან გულუაშვილმა ჟურნალისტებთან განაცხადა, რომ ფირცხალავას მიერ დღეს მიცემული ჩვენება, არცერთი დეტალით არ ემთხვევა უკვე დაკითხული 60 მოწმის ჩვენებებს.
რაც შეეხება დაცვის მხარეს, ადვოკატი დავით ხაჟალია აცხადებს, რომ ფირცხალავა ყვება იმ ფაქტობრივ გარემოებებს, რისი თვითმხილველიც უშუალოდ იყო. მისი თქმით, დაკითხვით დადასტურდა, რომ 2006 წლის 2 მაისს მიმდინარეობდა ჩვეულებრივი რიგითი დაკავების ოპერაცია და ლიკვიდაციის ბრძანება გაცემული არ ყოფილა.
ხაჟალიას განცხადებით, სავარაუდოდ, სროლის გადაწყვეტილების მიმღები იყო პიროვნება, რომელიც უშუალოდ ეპიცენტრში ხედავდა, თუ რა ხდებოდა ადგილზე.
მისივე თქმით, ფირხალავას სროლის ბრძანება არ გაუცია და როდესაც სპეცრაზმელები ამბობენ, რომ ცეცხლი მას შემდეგ გახსნეს, რაც დაინახეს რომ კახაბერ ნაკანმა გახსნა ცეცხლი, გახსნა თუ არა ცეცხლი კახაბერ ნაკანმა, ამას ნაკანი დაკითხვისას სასამართლოში იტყვის.
შემდეგი პროცესი ე.წ. კორტების სპეცოპერაციის საქმეზე 8 ოქტომბერს 11:00 საათზე ჩაინიშნა.
