ახალი პოლიტიკური ცენტრი ახალი ინიციატივით გამოდის, რომლის თანახმადაც, ნარკოლოგიური შემოწმება მხოლოდ სასამართლოს ნებართვით იქნება შესაძლებელი. ცენტრის ერთ-ერთმა დამფუძნებელმა გოგა ხაჩიძემ ამის შესახებ პარლამენტში კანონპროექტი შეიტანა.
"ახალი პოლიტიკური ცენტრის მიერ მომზადებული საკანონმდებლო ინიციატივის მიღების შედეგად, არანებაყოფლობითი ნარკოლოგიური შემოწმება ვერ მოხდება სასამართლოს შესაბამისი განჩინების გარეშე. 2013 წელს ჯამში 60 196 ადამიანი გადაიყვანეს არანებაყოფლობით ნარკოლოგიურ ტესტირებაზე. მათგან 62%-ს არ დაუდგინდა ნარკოტიკის მოხმარების ფაქტი", - განაცხადა ხაჩიძემ.
კანონპროექტის თანახმად, თუ პოლიციელს ექნება დასაბუთებული ვარაუდი, რომ პირმა ექიმის დანიშნულების გარეშე მოიხმარა ნარკოტიკული ნივთიერება, იგი უფლებამოსილი იქნება, დააკავოს იგი. თუ პირი ნარკოტესტირებაზე თანახმა არ იქნება, პოლიციელი მას წარუდგენს სასამართლოს. იმ შემთხვევაში, თუ მოსამართლე მიიჩნევს, რომ პირის მიერ ნარკოტიკული ნივთიერების ექიმის დანიშნულების გარეშე მოხმარების შესახებ ვარაუდი დასაბუთებულია, მას უფლება ექნება, გამოიტანოს განჩინება არანებაყოფლობითი გამოკვლევის შესახებ.
პარლამენტში ახალმა პოლიტიკურმა ცენტრმა ინიციატივა მას შემდეგ დაარეგისტრირა, რაც 2015 წლის ევროკომისიის ანგარიში გამოქვეყნდა. ანგარიშში საქართველოს ხელისუფლებას მოუწოდებენ, განიხილონ სასამართლო კონტროლის შემოღება პოლიციის მიერ დაუგეგმავ ნარკოლოგიურ შემოწმებაზე.
პარლამენტმა ახალი პოლიტიკური ცენტრის ინიციატივა წარმოებაში უკვე მიიღო.
