ზურაბ ჟვანიასა და რაულ უსუპოვის ცხედრებზე ჩატარებული ექსპერტიზის ამსახველი ვიდეომასალის ფრაგმენტები აჩვენეს დღეს სასამართლოს დახურულ დარბაზში.
ყოფილი პრემიერის გარდაცვალების საქმეზე ბრალდებული კობა ხარშილაძისა და მიხეილ ძაძამიას წინააღმდეგ საქმის განხილვის შემდეგ, ხარშილაძის ადვოკატმა ტარიელ კიკნაძემ განაცხადა, რომ ვიდეომასალებში იგი დაზიანებებს ვერ ხედავს.
საქმის პროკურორმა ზვიად გუბელაძემ კი აღნიშნა, რომ ცხედრებზე დაზიანებები შეინიშნება.
ოთხსაათიანი მასალიდან ნაფიცი მსაჯულების წინაშე ჩანაწერის მხოლოდ ფრაგმენტები წარმოადგინეს. დღევანდელ პროცესზე ასევე გამოკვლეული იქნა ბრალდების მხარის წერილობითი მტკიცებულებების ნაწილიც.
პროკურატურას 7 მოწმე დარჩა დასაკითხი. ამის შემდეგ კი დაცვის მხარის მტკიცებულებების გამოკვლევა დაიწყება. შემდეგი სხდომა 3 აგვისტოს, 11.00 საათზეა ჩანიშნული.
