საბერძნეთის პარლამენტმა ევროზონის ლიდერებთან მიღწეული შეთანხმების რატიფიცირება მოახდინა. "ბიბისის" ინფორმაციით, შეთანხმებას მხარი დაუჭირეს "სირიზას" დეპუტატებმა, ასევე ქვეყნის ყოფილმა ფინანსთა მინისტრმა იანის ვარუფაკისმა. აღსანიშნავია, რომ კენჭისყრის დროს, დარბაზი დატოვა პარლამენტის სპიკერმა ზოე კონსტანტოპულომ, დარბაზში დაბრუნებულმა კი მიღებულ ზომებს "სოციალური გენოციდი" უწოდა.
საბერძნეთის პარლამენტში ბრიუსელის შეთანხმების რატიფიცირება ათენის ქუჩებში მასობრივი აქციების ფონზე მიმდინარეობდა.
შეგახსენებთ, რომ სტრუქტურული რეფორმების პაკეტი ასე გამოიყურება:
- უნდა დაიწყოს ფართომასშტაბიანი და გამჭვირვალე პრივატიზაციის პროგრამა, რომლითაც ქვეყნის სუვერენული ვალის ნაწილის დაფარვა მოხდება.
- დამატებითი ღირებულებისა და სხვა გადასახადების განაკვეთის გაზრდა.
- უნდა გატარდეს მნიშვნელოვანი ცვლილებები სოციალური უზრუნველყოფის მიმართულებით და შემცირდეს საპენსიო დახმარების მოცულობა.
- გასული ექვსთვიანი პერიოდის მანძილზე მიღებული ზოგიერთი კანონის გაუქმება უნდა მოხდეს.
- საბერძნეთის საბაზრო ეკონომიკის ძირეული ლიბერალიზაცია უნდა მოხდეს და მთელი რიგი ბაზრები, მათ შორის ფარმაცევტული ბაზარიც კონკურენციისთვის უფრო ღია უნდა გახდეს. ქვეყანას OECD-ის რეკომენდაციების გათვალიწინებაც დაევალა.
- ქვეყნის შრომის ბაზრის შესახებ მკაცრი მიმოხილვა უნდა მომზადდეს, აღნიშნული პუნქტი საბერძნეთის ჩრდილოვანი ეკონომიკისა და არალეგალური სამუშაო ძალის შესახებ ინფორმაციის შეგროვებას შეეხება.
- უნდა მოხდეს ქვეყნის მმართველობის სისტემის დეპოლიტიზება.
- საბერძნეთის ცენტრალური სტატისტიკის ბიუროს მიუკერძოებლობის უზრუნველყოფა. (საბერძნეთის სტატისტიკის ბიურომ 1999 წელს ევროზონაში შესასვლელად მონაცემები გააყალბა)
- ადმინისტრაციული ხარჯების შემცირება
საბერძნეთს საერთაშორისო კრედიტორების მიმართ 317 მილიარდი ევრო მართებს, რაც მისი მთლიანი შიდა პროდუქტის 177%-ია. ქვეყნის ყველაზე დიდი კრედიტორი გერმანიაა.
საბერძნეთის პარლამენტის გარდა, ბრიუსელში მიღწეული შეთანხმების რატიფიცირება ევროზონის რამდენიმე ქვეყნის პარლამენტმა, მათ შორის, გერმანიამაც უნდა მოახდინოს.
