თბილისის საქალაქო სასამართლოში ნაფიცი მსაჯულების პირობებში მიმდინარე საქმეზე დაკითხვისას, ყოფილი პრემიერის ზურაბ ჟვანიას მეუღლემ განაცხადა, რომ ბრალდებულები ტყუიან. ნინო ქადაგიძემ განმარტა ის გარემოებები რატომაც მიიჩნევს, რომ დაცვის ყოფილი წევრები ხარშილაძე და ძაძამია ,,ბოდავენ”.
,,შემთხვევის ღამეს ვცდილობდი ზურასთან დაკავშირებას, ძაძამიამ მითხრა, რომ შეხვედრაზეა და ათ წუთში დარეკეო. მერე დავურეკე, კიდევ არ დამალაპარაკა. დაახლოებით 3-დან 4 საათამდე გაგრძელდდა ეს ყველაფერი, არ მახსოვს ზურასთვის დამერეკოს და ათ წუთში არ გადმოერეკა. შემდეგ, როდესაც შემთხვევის ადგილზე შესვლას ვცდილობდი, ხარშილაძე არ მიშვებდა შიგნით. როდესაც ოთახში შევედი, მახსოვს დავინახე ზურა, თეთრი პერანგი ეცვა, ოთახში ბევრი ხალხი იყო, ასევე იყო ის ბიჭიც, რომელსაც თეთრი პერანგი ეცვა.
ასევე, რატომ ვფიქრობ რომ ტყუიან - სამ სააათზე გაზი კორპუსში გადაკეტილი იყო, რაღაცას ბოდავენ, ამბობენ, რომ დაურეკა ძაძამიამ ხარშილაძეს, ფანჯარა გავტეხეო, გაზი გამოვარდაო, ამბობს ხარშილაძე. გაზს სუნი არ აქვს. მერე ხარშილაძე ამბობს, რომ შევედი შიშინის ხმა მომესმა და გამოვრთე გამათბობელიო. მეზობლები საერთოდ არაფერს ამბობენ, გაფრთხილებულები იყვენენ, რომ ხმა არ ამოეღოთ, შეშინებულები არიან.
ამასთან, როგორ გგონიათ, მწეველი ზურა, რომელიც დღეში ორ კოლოფს ეწეოდა, დაკეტილ ფანჯარაში გაჩერდებოდა? შემდეგ აღმოჩნდა, რომ არცერთი ფანჯარა არ იკეტებოდა, საკეტები არ მუშაობდა, გაზის გამათბობელზე ნამწვიც არ აღმოჩნდა.
ზურას გარდაცვალების შემდეგ ფოტოებზე ვნახე, რომ ტუჩზე ჰქონდა ნახეთქი შიგნიდან სისხლჩაქცევებით, როდესაც ადეიშვილს ვუთხარი, ფოტოზე ვნახე-მეთქი, აბა სად არისო მითხრა, მოიტანა ფოტოები და აღარ იყო ეს სისხლჩაქცევები, გამქრალი იყო.
ასევე, კუჭში აღმოუჩინეს ზურას მოხარშული ძეხვი, დიეტაზე იყო და ღამის სამ საათზე ძეხვს როგორ შეჭამდა? ექსპერტიზა ვინც ჩაატრაა, მისი ნახვა მინდოდა, მაგრამ არ დამალაპარაკეს, არ მაჩვენეს.
ხალხმა რომ არ დაიჯერა ამათი ტყუილები, ეს იმიტომ რომ ბევრი ადამიანი ხედავდა, თუ როგორ ცხოვრობდა ზურა“, - განაცხადა ნინო ქადაგიძე,
როგორც ნინო ქადაგიძე-ჟვანია აცხადებს, ზურაბ ჟვანიას თან დაჰქონდა სეიფის გასაღები. გარდაცვალების შემდეგ კი მას აქვს ინფორმაცია, რომ გასაღებით ისარგებლა კობა ხარშილაძემ.
"სეიფი იყო როგორც კანცელარიაში, ასევე ოფისში. ოფისის წარმომადგენლისგან კი მაქვს ინფორმაცია, რომ იქ იყო მისული ხარშილაძე და რაღაცეები წაიღო. სეიფში ინახებოდა საჩუქრები, ოფიციალური დოკუმენტები, საათი და ჩვენი პირადი ნივთები", - ნინო ქადაგიძემ
ბრალდების მხარის შეკითხვების შემდეგ მან დაცვის მხარის შეკითხვებსაც უპასუხა. ნინო ქადაგიძე-ჟვანია დაცვის მხარის ადვოკატის შეკითხვებმა რამდენჯერმე გააღიზიანა.
,,რთული იყო 10 წელი. გირგვლიანის დედამ ვერ გაუძლო და გარდაიცვალა, მე კი სიკვდილის უფლება არ მქონდა, ვინაიდან შვილები მყავდა”, - განაცხადა მან.
ქადაგიძის განცხადებით, ზურაბ ჟვანიას გარდაცვალების შემდეგ, პრეზიდენტ სააკაშვილთან ორჯერ ქონდა კონტაქტი. ქადაგიძე იხსენებს, რომ პირველი შეხვედრისას მან უთხრა, რომ გამოძიებისთვის თავი დაენებებინა და რაც უნდოდა ის ეთხოვა. მეორედ კი, როგორც ქადაგიძე-ჟვანია ამბობს, სააკაშვილს საერთაშორისო გამოძიების დაწყება მოსთხოვა, რაზეც უარი მიიღო.
რაც შეეხება ზურაბ ჟვანიას ყოფილ თანაგუნდელებს, როგორც ნინო ქადაგიძე ამბობს, მეუღლის გარდაცვალების შემდეგ მათთან კონტაქტი არ ჰქონია.
"ბარამიძე ჩემს გვერდით ცხოვრობდა და ჩემს სახლში ფეხი არ შემოუდგამს გარდა პირველი კვირისა, სანამ ყველაფერი გაირკვეოდა. მათ მოსასვლელი პირი არ ჰქონდათ და ამიტომ გოგორიშვილი, ბარამიძე, მაჭავარიანი და გოკა გაბაშვილი არიან კარგი შემსრულებლები, ზურა რასაც ეტყოდა იმას აკეთებდნენ. ზურა აღარ არის და ისინი ახლა რასაც სააკაშვილი ეტყვის, იმას გააკეთებენ.
