გარემოს დაცვის ყოფილი მინისტრი ელგუჯა ხოკრიშვილი თანამდებობის დატოვების შემდეგ პირველ განმარტებას აკეთებს და აცხადებს, რომ მის მიერ დასახელებული მიზეზი სრულიად შეესაბამება სიმართლეს.
,,მიზეზი რომელიც ჩემს განცხადებაშია მოყვანილი სრულად შეესაბამება სიმართლეს. მიზეზი არის ის რომ მე ვბრუნდები ჩემს ოჯახთან. მინდა მადლობა გადავუხადო პრემიერ-მინისტრს, რომელმაც ჩემი პოზიცია გაიზიარა. ასევე, მადლობას ვუხდი მთავრობის თითოეულ წევრს. სამინისტროში რჩება საკმაოდ ძლიერი გუნდი, რომელიც გააგრძელებს სწორ პოლიტიკას გარემოს დაცვის სფეროში”, - აღნიშნა ჟურნალისტებთან ხოკრიშვილმა, რომელიც ამ დროისთვის სამინისტროში იმყოფება.
შეგახსენებთ, რომ გარემოსა და ბუნებრივი რესურსების დაცვის მინისტრის პოსტი უკვე ვაკანტურია. საქართველოს პრემიერ–მინისტრმა ირაკლი ღარიბაშვილმა გარემოსა და ბუნებრივი რესურსების დაცვის მინისტრის ელგუჯა ხოკრიშვილის თხოვნა თანამდებობიდან გადადგომასთან დაკავშირებით, უკვე დააკმაყოფილა.
გარემოსა და ბუნებრივი რესურსების დაცვის მინისტრმა პრემიერ-მინისტრს თანამდებობიდან გადადგომის თხოვნით დღეს მიმართა. მიზეზად ოჯახთან დაკავშირებული საკითხი დასახელდა.