ბიუროს წევრებმა, 1-3 აპრილის პლენარული სხდომების დღის წესრიგის განსახილველ საკითხებზე და ახალ საკანონმდებლო ინიციატივებზე იმსჯელეს.
ბიუროს წევრების გადაწყვეტილებით, შესაბამის კომიტეტებში თექვსმეტი ახალი საკანონმდებლო ინიციატივის განხილვის პროცედურა დაიწყება, მათ შორისაა კანონპროექტი ,,არასრულწლოვანთა მართლმსაჯულების კოდექსი“.
კანონპროექტი აწესრიგებს არასრულწლოვანთა სისხლისსამართლებრივი და ადმინისტრაციულ სამართლებრივი პასუხისმგებლობის, აგრეთვე მათი მონაწილეობით აღნიშნული პროცესის წარმოების თავისებურებებს, სასჯელისა და სხვა ზომების აღსრულების სპეციალურ წესებს.
ახალ საკანონდებლო ინიციატივებს შორის იყო კანონპროექტი ,,საქართველოს საგადასახადო კოდექსში ცვლილლების შეტანის შესახებ“, რომლის ავტორიც პარლამენტის წევრი, მიხეილ მაჭავარიანია. კანონპროექტის მიხედვით, 2015 წლისთვის მეწარმე ფიზიკური პირის მიერ საქმიანობის სასაქონლო ნომეკლატურის შესაბამის სასაქონლო პოზიციაში აღნიშნული მსუბუქი ავტომობილის დეკლარირება ხდება შსს-ს მონაცემთა ავტომატიზებულ ბაზაში სატრანსპორტო საშუალების რეგისტრაციის ან მოწმობის შევსებიდან 180 კალენდარულ დღეში.
ამასთან, მეწარმე ფიზიკური პირები გათავისუფლდებიან 2014 წლის 1 იანვრიდან 2015 წლის 1 მაისის მდგომარეობით შემოყვანილ სატრანსპორტო საშუალებებზე დაკისრებული სანქციებისგან და დაექვემდებარებიან დადგენილი წესით ჩამოწერას. საბიუჯეტო ოფისის დასკვნის მიხედვით, წარმოდგენილი ინიციატივის განმარტებითი ბარათი მოიცავს ფინანსური გავლენის ზოგად შეფასებას, თუმცა არ წარმოადგენს სრულ ფინანსურ ინფორმაციას სახელმწიფო ბიუჯეტის საშემოსავლო ნაწილზე მოსალოდნელი გავლენის შესახებ. აღნიშნულიდან გამომდინარე, ბიურომ მიიღო გადაწყვეტილება, რომ კანონპროექტის ინიცირება მოხდება მომდევნო ორშაბათს, მანამდე კი პროექტზე მუშაობა გაგრძელდება კონსულტაციების რეჟიმში, რათა არსებული ხარვეზები გასწორდეს.
პარლამენტის თავმჯდომარემ, დავით უსუფაშვილმა ბიუროს წევრებს შეახსენა, რომ 31 მარტს, სამშაბათს, პარლამენტში დაგეგმილია საქართველოს პრეზიდენტის ყოველწლიური მოხსენებით გამოსვლა.
პრეზიდენტის გამოსვლის შემდეგ სხდომის გაგრძელების ფორმატთან დაკავშირებით საპარლამენტო უმრავლესობისა და საპარლამენტო ოპოზიციის წარმომადგენლებმა საკუთარი პოზიციები დააფიქსირეს.
პარლამენტის თავმჯდომარემ განმარტა, რომ: ,,საქართველოს კანონმდებლობა ითვალისწინებს ორ შესაძლო ფორმატს: ფრაქციების თავმჯდომარეების გამოსვლას ან დებატებს, რომელიც იმართება საქართველოს პარლამენტის რეგლამენტით პოლიტიკური დებატებისთვის დადგენილი წესით“.
მისივე თქმით, ფორმატის შესახებ გადაწყვეტილება პარლამენტის ბიურომ უნდა მიიღოს. ბიუროს წევრები შეთანხმდნენ, რომ აღნიშნულ გადაწყვეტილებას ერთი კვირის შემდეგ, მომავალ ორშაბათს მიიღებენ.
