ნათლისღების დღესასწაულზე, სამების საკათედრო ტაძარში 38-ე საყოველთაო ნათლობა გაიმართება და სრულიად საქართველოს კათოლიკოს-პატრიარქის ნათლული კიდევ 1036 ბავშვი გახდება.
საყოველთაო ნათლობა სამების საკათედრო ტაძარში 17:00 საათისთვის დაიწყება, ხოლო უწმინდესი ტაძარში 9:00 საათისთვის მივა და ნათლულებს დალოცავს.
პატრიარქისგან ნათლულებს საჩუქრად ნათლობის მოწმობა, ჯვარი და პატრიარქის საშობაო ეპისტოლე გადაეცემათ.
დღეისთვის სრულიად საქართველოს კათოლიკოს პატრიარქს 22 059 ნათლული ჰყავს. ისინი ჯვარდაწერილი წყვილების ოჯახში მესამე და მომდევნო შვილები არიან. ჩვილთა პირველი საყოველთაო ნათლობა კი ყოვლადწმინდა სამების საპატრიარქო ტაძარში 2008 წლის 19 იანვარს შედგა.
