,,თავისუფალი დემოკრატების" ერთ-ერთი ლიდერის ალექსი პეტრიაშვილის განცხადებით, კომპანია "დელტაკომის" საქმიანობა აუცილებლად გამოსაძიებელია. როგორც პარტიის ოფისში გამართულ პრესკონფერენციაზე პეტრიაშვილმა განმარტა ,,დელტაკომი" ყოველთვიურად ასობით ათას ლარს იღებდა შსს-გან მომსახურეობისთვის.
,,ნიშანდობლივია, რომ კომპანია "დელტაკომის" და მისი შვილობილი კომპანიის ხელმძღვანელ არის ზურაბ კოტარია, რომელიც ვანო მერაბიშვილის შს მინისტრობის პერიოდში გახლდათ ოპერატიულ-ტექნიკური უზრუნველყოფის დეპარტამენტის ხელმძღვანელი. ეს დეპარტამენტი დაკავშირებული იყო სწორედ იმ უკანონო მოსმენებთან, თვალთვალთან, ჩაწერებთან და ყველაფერ იმ უბედურებასთან რაც ამდენი წლის განმავლობაში იყო ჩვენი საზოგადოების შეშფოთებისა და კრიტიკის საგანი", _განმარტა პეტრიაშვილმა.
პეტრიაშვილმა ჟურნალისტებს ის ამონაწერიც წარუდგინა რომლის თანახმად კომპანია "დელტაკომის" შვილობილი კომპანიის ,,დელტატივის" გენერალური დირექტორი არის ზურაბ კოტარია.
,,მე მაქვს ხელთ ამონაწერი საჯარო რეესტრიდან, რომლის თანახმად კომპანია „დელტაკომის“ შვილობილი კომპანიის, „დელტა ტივის“ დირექტორი არის ზურაბ კოტარია, ხოლო ამ კომპანიის მფლობელი გახლავთ დავით ქიქოძე და მეორე კომპანიის „დელტა კომის“ მფლობელიც, ასევე გახლავთ მისი ძმა პაატა ქიქოძე",_აცხადებს პეტრიაშვილი.
მისივე განმარტებით ,,დელტაკომი" ყოვეთვიურად ასობით ათას ლარს იღებდა შსს- გან მომსახურეობისთვის.
,,ჩვენი ინფორმაციით, ,,დელტაკომის" იღებდა ასეულ ათასობით ლარს ყოველთვიურად ამ მომსახურეობაში. სერიოზულ ეჭვს ბადებს ის რომ ,,დელტაკომის" მომსახურება და შეთავაზება იყო გაცილებით ძვირადღირებული, ვიდრე ეს შეთავაზება წამოსული იყო ,,სილქნეტისგან". ასევე საზოგადოებამ მისნდა იცოდეს, რომ ეს არ იყო უფასო მომსახურება 2014 წლის განმავლობაში რომელსაც დღეს ასეთი გულდასმით, დაჟინებით მალავს შსს საზოგადოებისგან.მთელი ეს სქემა მიმართული იყო პოლიტიკური საქმიანობის წინააღმდეგ, ,,თავისუფალი დემოკრატების" საქმიანობის წინააღმდეგ", _განაცხადა პეტრიაშვილმა და საზოგადოებას, ჟურნალისტებს მოუწოდა დაინტერესდნენ ზურაბ კოტარის საქმიანობით.
