საზოგადოება „ივერია" დღევანდელ პრესკონფერენციაზე პრემიერ-მინისტრის მიერ უკრაინაში ქართველი ჯარისკაცების მიერ საბრძოლო მოქმედებებში მონაწილეობასთან დაკავშირებით გაკეთებულ კომენტარს ეხმიანება და მისგან პოლიტიკური პასუხისმგებლობის აღებას მოითხოვს.
„საზოგადოება აცხადებს, რომ ასეთი განცხადების ავტორს ნებისმიერ დემოკრატიულ სახელმწიფოში თანამდებობის დატოვება მოუწევდა.
ალექსანდრე გრიგოლაშვილის დაღუპვასთან დაკავშირებით თავდაცვის სამინისტროს განცხადების გამო, საზოგადოება „ივერიამ " მ.წ. 21 დეკემბრის განცხადებაში მოითხოვა თავდაცვის მინისტრის გადადგომა.
როგორც გამოაშკარავდა, თავდაცვის სამინისტროს აღნიშნული განცხადების უკან დგას არა თავდაცვის მინისტრი, არამედ საქართველოს პრემიერ-მინისტრი ირაკლი ღარიბაშვილი. დღევანდელ პრეს-კონფერენციაზე მან დაადასტურა, რომ ეთანხმება თავდაცვის სამინისტროს განცხადებას.
საზოგადოება უკვე მიეჩვია აღმასრულებელი ხელისუფლების ხელმძღვანელის მიერ უპასუხისმგებლო გამონათქვამებს, მაგრამ ეროვნული ინტერესების საწინააღმდეგო პოზიციების ასეთი, ოკუპანტის მაამებლური, საჯარო დაფიქსირება ყოველგვარ საზღვარს სცდება. მსგავსი კოლაბორაციონისტული განცხადებები ანტისახელმწიფოებრივია, არცხვენს ქართულ ჯარს და ქართველი მეომრის მებრძოლ სულს, აკნინებს უკრაინის სამართლიან ბრძოლას ჩვენი საერთო მტრის წინააღმდეგ.
ასეთი განცხადების ავტორს ნებისმიერ დემოკრატიულ სახელმწიფოში თანამდებობის დატოვება მოუწევდა. აღნიშნულიდან გამომდინარე, საზოგადოება „ივერია" მოითხოვს პრემიერის მიერ შესაბამისი პოლიტიკური პასუხისმგებლობის აღებას", - ნათქვამია განცხადებაში.