მეორე დღეა, მოსკოვის დომოდედოვოს აეროპორტიდან თბილისის მიმართულებით, ავიაკომპანია „ურალის ავიახაზების" თვითმფრინავის 196 მგზავრი, გამოფრენას ვერ ახერხებს.
სააგენტო „ჯი-ეიჩ-ენს" დაუკავშირდა მგზავრი ნ.დ., რომელმაც განაცხადა, რომ მეორე დღეა მგზავრები, რომელთა შორის არიან მცირეწლოვნები და ხანდაზმულები - სულ 196 ადამიანი - ვერ ახერხებენ თბილისში გამომგზავრებას.
„ორი დღეა, არავინ გვაქცევს ყურადღევას, ადამიანებს შიათ, არიან საშინელ პირობებში. გვეუბნებიან, რომ თვითმფრინავის გასაფრენად საჭიროა რომელიღაც მინისტრის ხელმოწერა. არ ვიცით რა ხელმოწერაზეა საუბარი. ასევე ამბობენ, რომ ეს არის „აირზენას მაფია". რა მნიშვნელობა აქვს ვისი მაფიაა, ცხადია, რომ საშინელ დღეში ვართ. ყოველ ორ საათში მოდის ავიაკომპანიის წარმომადგენელი და გვეუბნება, რომ აი, ახლა მოაწერენ ხელს იმ რაღაც ქაღალდს. მერე მოდიან და ამბობენ, რომ „აირზენა" აფერხებს", - აცხადებს მგზავრი.
მისივე თქმით, „უარალის ავიაკომპანიის" რეისი #2707, რომელიც 23 დეკემბერს უნდა შემდგარიყო 25 დეკემბრამდე გადადეს, მაგრამ ამ დრომდე მგზავრები კვლავ აეროპორტში არიან.
„ამ დილით, 07:00 საათზე, გვითხრეს, რომ თბილისიდან მიიღეს გაფრენის უფლება. რეისი 09:30 საათზე შესრულებულიყო. ჩაგვსვევს თვითმფრინავში, მაგრამ 09:00 საათზე ისევ ჩამოგვყარეს - დარეკეს არ მიგიღებთო. არ შეიძლება დაგვეხმაროთ? ჩვენი, - მგზავრების რა ბრალია „აირზენას" და სახელმწიფოს დავა და ურთიერთობების გარკვევა?", - აცხადებს მგზავრი.